RCLM Baucau (12/03/2026)—Estrada ligasaun area Daregata aldeia Ledatame ba suku Uailili Postu Administrativu Baucau Vila Munisipiu Baucau, kuaze Kilometru tolu resin Kondisaun Grave.
Xefe Suku Uailili Hernani de Jesus Arauju Ribeiro Rekoñese kondisaun estrada husi Suku Uailili ba Area Daregata dadaun ne’e, kondisaun grave tebes hodi difikulta ba komunidade sira asesu ba transporte publiku, hodi lori produtu lokál hanesan Kulu, modo, nuu, no seluk tan ba merkadoria.
Hernani hatutan relasiona ho kondisaun estrada komunidade sira, obrigadu la’o ain lori produtu lokál to’o iha dalan publiku Ualili mak foin asesu transporte Publiku.
“Husi suku to’o daregata hamutuk tres kilo i to’o agora nia kondisaun ne’ebe grave tebes, ita nia komunidade sira kuandu atu lori sira nia produtu mai iha merkadu transporte labele tun ba, sira tenke lao ain, tutur deit mak foin to’o fatin, hanesan xefe do Suku programa ida ne’e ami aprejenta hotu tiha ona, primeiru mak liu husi programa PNDS maibe la sufisiente oinsa ami bele halo hotu, entaun ami aprenjenta ba iha Munisipiu ba iha governu Setral para atu bele hadia para ita nia komunidade bele uza no bele lori sira nia produtu sira mai merkadu”. Hatete xefe suku ba jornalista sira iha resintu Administrasaun Munisipiu Baucau quinta, 12/03/2026
Xefe Suku Ualili husu ba Autoridade Munisipiu Baucau, hodi enkamina preokupasaun ne’e ba Nasionál, atu nune’e bele hadia lalais estrada refere bele faselita komunidade sira.
“Primeiru ba Autoridade Munisipiu oinsa bele aselera lalais hodi aprejenta iha Governu, para oinsa bele halo lalais estrada ida ne’e para sai diak, para ita nia komunidade bele uza”. Hateten Hernani
Estrada refere asesu husi komunidade kuaze xefe familia hamutuk atus rua resin, husi aldeia tolu mak hanesan aldeia Ledatame, Manulai no aldeia Waturou.
Ekipa Kobertura : RCLM
