RCLM Baucau (12/03/2026)—Membru Asembleia Postu Administrativo Baguia iha nivel ASPA, deside proposta hitu ne’ebé sei lori ba iha Consellu Consultivu Munisipál mak hanesan, rehabilitasaun estrada Baguia Vila to’o iha Suku Afaloikai, Merkadu, kampu football, rehabilitasaun ba rezidensia Administrador Postu Administrativu nian, inklui moru no merkadu iha Suku Lavateri.
Administrador Postu Administrativu Baguia Mario Xavier da Silva hateten, membru asembleia Postu sira deside propostu hitu ne’e, tamba programa hitu ne’e mak nesesidade tebes ba komunidade sira hanesan estrada no merkadu importante ba komunidade sira.
“Tamba ida ne’e mak hanesan nesesidade importante ne’ebé mak ami hakarak tau, membru asembleia Postu Administrativu maka define tan ne’e hanesan proposta prioridade sira ne’ebé maka nesesidade tebes ba komunidde sira liu-liu ita hare hanesan estrada sira ne’e liga ba Suku, husi Postu liga ba Suku sira ne’e prioridade para ita tau matan atu komunidade sira bele lori sira nia produtu, alende ne’e mos hanesan merkadu ne’e hanesan fatin konsentrasaun ba komunidade atu bele faan sira nia produtu”. Dehan APA Baguia ba jotnalista RCLM Quarta 11/03/2026
Administrador Baguia hatutan, maske kada tinan sempre hatama programa perioridade hitu maibe sempre aprvova deit ida ou rua, iha ne’ebé sei fo impaktu dezenvolvimentu iha Postu Administrativu.
“Ne’e los, fo Impaktu boot ba ami nudar membru asembleia, ita sempre lori proposta, kadan ita lori prposta 7 mai nivel Munisipiu mais dala ruma hetan aprovasaun ,hetan aprovasaun ida ka rua ne’e tamba sei lori ba nivel Nasional iha ne’eba mak foin tetu” hateten Mario
Espera katak konsellu konsultivu Munisipál bele aprova proposta ne’ebé mak prepara husi asembleia Postu Administrativu, hodi halo dezenvolvimentu maibe depende ba orsamentu husi Munisipiu Baucau.
Enkuantu iha tinan ne’e projetu rua mak implementa iha Postu Administrativu Baguia, merkadu multi-suku iha Suku Osso-huna, Postu Saúde inklui rezidensia ba pessoal Saúde.
Ekipa Kobertura : RCLM
