RCLM (09/03/2026)—Kondisaun estrada hahu husi area Komuloli to’o iha Kaisaa Suku Buruma, Postu Baucau vila Munisipiu Baucau, kuaze sanolu resin mak nakfera no balun ameasa monu.
Relasiona ho kondisaun estrada aktual ne’ebe a’at, fo impaktu ba movimentu transporte kareta no motor ne’ebe mai husi dirasaun Munisipiu Lautem, inklui Postu Administrativo Lima husi Munisipiu Baucau.
Motorista Arcalau da Costa hateten, maske Governu halo ona rehabilitasaun maibe ho natureza nia hahalok, estrada refere kontinua monu fila fali, tamba nee husu ba governu atu tau atensaun.
“Estrada aat ne’e ida komuloli leten ne’e, Buruma iha fatin hira, fatin ida mak ne’e ida iha area eskola nian ida, iha mevel ida iha wailaha hamutuk kala 10 resin, tamba kolega barak mak monu iha ne’e ho ida karaik ne’e tamba estrada kotu, husu ba Governu para hadia ami nia estrada ne’e lalais, tamba kolega sira barak mak monu”. Dehan Motorista iha Area Buruma segunda, 09/03/2026.
Entertantu motorista Euclides da Silva reforsa, kondisaun estrada monu no nakfera halo ema barak mak hetan asidente
“Kondisaun estrada Kota lama ba laga ita hare, liu-liu area Buruma no kaibada nian husi komuloli tun ba to’o iha kaisa ne’e kondisaun ladun diak, fo impaktu ba transporte públiku barak mai iha ne’e akontese monu hela deit”. Haktuir Euclides
Koordenador Destakadu Ministeriu Obras Publika Munisipiu Baucau Diogo Cipriano Calleja rekoñese, Estrada iha area Buruma nian barak mak monu no nakfera, maibe ne’e kompetensia husi Nasionál nian.
“Responsabliza direita husi be unidade jestaun projeitu ga Project management unit iha Ministeriu kaikoli ne’eba, ami rekoñese katak defeitus hanesan rai monu nakfera buat sira ne’e hotu, maibe buat sira ne’e hotu ita relata ona ba Nasionál, kompetensia tomak iha Nasional sei foti desijaun ba estrada refere, tamba projeitu imprestimu responsabliza husi unidade jestaun de projeito iha Ministeriu obras publika nia okos” hateten Koordenador Destakadu Ministeriu Obras Publika Munisipiu Baucau, Diogo Cipriano Calleja Segunda Feira ne’e (09/03/2026).
Tuir observasaun Jornalista iha tereinu nota katak, estrada ne’ebé uluk Indonesia nia tempu monu mak agora monu fila fali, tamba kauza husi rai halai.
Ekipa Kobertura : RCLM
