RCLM (09-03-2026)—Governu liu husi Ministériu Obras Públika (MOP) tinan ne’e, sei rehabilita estrada rurál hamutuk pakote ualu (8), iha Munisipiu Baucau tamba iha ona prosesu tenderizasaun.
Kordenadór Tékniku MOP Baucau Diogo Caleja Correia hateten, antes ne’e MOP Nasionál aprova proposta estrada rurál Munisipiu Baucau nian hamutuk pakote 12, maibe dadaun ne’e pakote ualu mak loke ona tenderizasaun, enkuantu pakote haat sei iha prosesu verifikasaun.
“Prosesu la’o hela tenderizasaun foin 8, hein de’it rezultadu bainhira DNA konklui hodi anúnsia sé mak manan nain bele implementa ona projetu, pakote haat mak ninia andamentu seida’uk prosesu tender sei iha verifikasaun nia laran,” dehan Diogo ba RCLM iha nia kna’ar fatin vila nova segunda ne’e (09/03/2026).
Estrada rurál pakote 8 ne’ebé tama ona faze tenderizasaun, pakote tolu (3) husi suku Lakuliu-Laku-dala- Uaibitai suku Letemumu ho distánsia 7,7km, pakote rua (2) husi Lawaliu suku Baguia ba suku Macalaco distánisa 5 km, suku Seiçal ba Festau suku samalari pakote ida (1) dinstánsia 3 km, suku Atelari ba Boru-dua pakote ida ho dinstansia 2,8 km kilometru, no pakote ida iha suku Maluro dinstánsia 2,8 km.
Alende ne’e Kordenadór Tékniku destakdu MOP Baucau relata, antes ne’e MOP implementa projetu hamutuk 44 iha Munisipiu Baucau, kompostu rehabilitasaun estrada Munisipal, estrada rurál, konstrusaun ponte no konstrusaun moru protesaun, nia progresu atinji 65,62%.
Nia esplika fator hatarde implementasaun projetu sira, tamba iklima udan no balun la iha dalan alternativa kompaña transporta materiál konstrusaun.
“Balun seida’uk ne’e tamba iklima no asesu alternativu la iha kompaña sira lori materiál konstrusaun, maibe balun la’o diák tebes, balun ne’ebé la’o ladun di’ak ita fó hanoin no orientasaun nafatin,” Diogo haktuir.
Projetu hamutuk 44 antes implementa iha teritoria Munisipiu Baucau, hahu husi tinan 2019-2025, projetu hamutuk 6 entrega ona, projetu 6 foin konklui 100% iha periodu retensaun, enkuantu restu 32 sei iha prosesu implementasaun. Orsamentu governu preve ba projetu 44 ne’e hamutuk milões 81.
Ekipa: Kobertura RCLM
