RCLM Baucau (09-03-2026)—Servisu Munisipál Edukasaun Baucau, koloka ona manorin bolsa kandidatu hamutuk 122 ba eskola primeiru siklu to’o terseiru siklu, iha Postu Administrativu ualu hodi subtitui manorin ne’ebé reformadu ona iha fulan dezembru tinan 2025.
Diretor Servisu Munisipál Edukasaun Baucau Afonso dos Santos da Costa haktuir, Servisu Munisipál Edukasaun simu manorin bolsa kandidatu faze da-hitu iha loron 05 fulan marsu ne’e, hamutuk 122 husi Ministeriu Edukasaun no koloka kedas ba eskola sira tuir lista husi termu aseitasaun.
“Ita simu iha Munisipiu agora ita koloka hotu ona ba eskola sira, ita faselita fó hatene inspektor no lider komunitariu sira,” Diretor Servisu Munisipal Edukasaun Baucau informa ba RCLM iha nia kna’ar fatin vila nova segunda ne’e (09/03/2026).
Afonso firma koloksaun manorin bolsa kandidata ba eskola, bazeia nesesidade eskola hodi subtitui manorin ne’ebé la hanorin ona tamba reforma, maibe seidauk to’o tamba manorin reformadu tinan kotu hamutuk atus ida haat nolu resin.
“Eskola ne’ebe hetan kolokasaun profesores husi primeiru siklu to’o terseiru siklu balun hetan na’in-ida to’o haat, no ida sentral bele to’o na’in lima konforme kada eskola nain hira mak profesor reforma, maske seidauk to’o balun sei menus no hein ne’e responsabilidade governu nian kompleta,” akresenta Diretor Munisipál Edukasaun Baucau.
Dirijente Edukasaun Munisipál Baucau, husu profesor kolokadu sira hala’o misaun ho responsabilidade nu’udar manorin kualifikadu, hodi eduka estudante sira iha kada eskola, alende servisu hamutuk entidades hotu iha sosiedade.
Ekipa Kobertura : RCLM
