RCLM Baucau (09/03/2026)—Tekniku matan politekniku HoREX Baucau Laurinda Guterres hateten, pasiente matan ne’ebé rejistu husi tinan 2025 to’o mai tinan 2026, husi idade hat nolu ba leten kuaze hamutuk besik ualu nolu, iha ne’ebé tau ona planu hodi hein dotor espesialista husi HNGV DIli, hodi halo operasaun ba pasiente matan sira.
Nia hatutan pasiente matan ne’ebe atu halo operasaun mak hanesan matan mutin la hare hetan, matan urat, no tensaun matan sae.
“pasiente ne’ebé mai iha lista tinan 2025 to’o mai iha 2026 agora besik 80, ne’ebé ami rai tiha ona hein doutor sira halo operasaun iha tinan ne’e, ba pasiente matan hanesan katarata, tuir mai mak terejium no glaukoma”. Dehan Laurinda Guterres ba jornalista sira iha nia knar fatin segunda, 09/03/2026
Tekniku matan iha HoREX Baucau husu ba sidadaun sira ne’ebé mak problema matan hak-besik an ba Horex Baucau atu halo konsulta, tamba matan sai importante ba isin lolon.
“Maluk sira ne’ebe mak problema matan nafatin hakbesik an mai Sentru Saude no iha HoREX Baucau halo konsultasaun ba matan, tamba iha ne’e ita halo atendimentu loro loron”. Hateten Laurinda
Entertantu pasiente matan husi Postu Administrativo Matebian Bazilio da Costa hateten, sente kontente, tamba bele halo ona konsultasaun matan hodi ba tuir teste karta kondusaun nian.
“Ohin hau mai iha ne’e atu konsulta matan, atu kompleta atestadu mediku hodi ba teste karta kondusaun, maibe ohin hau koko matan maibe diak hela”. Dehan pasiente
Entertantu pasiente sira ne’e mai husi Munisipiu Lautem, Manatuto, viqueque, Dili inklui Munisipiu Baucau rasik, enkuantu stock aimoruk no oklu sufsiente iha Hospital Regional Eduardu Ximenes Baucau hodi atende ba pasiente matan sira.
Ekipa Kobertura : RCLM
