RCLM Baucau (06-03-2026)—Autoridade Munisipál Baucau la iha kompetensia halo indiminizasaun ba komunidade afetadu rehabilitasaun estrada urbana Baucau, maibé kompetensia husi Governu Sentrál.
Prezidente Autoridade Munisipiu Baucau Veneranda Eurico Lemos Martins hateten, Autoridade Munisipal antes ne’e estabelese ona ekipa konjunta husi teras propriedades, no involve entidades oin-oin ne’ebé lidera husi Sekretariu Munisipal Planeamentu Dezenvolvimentu Intergadu (PDI) hamutuk ho Ministeriu Obras Publika, sei halo reuniaun interna hodi hare prosesu edifisiu privadu inklui moru, varanda uma komunidade balun, ne’ebé afeta ba implementasaun rehabilitasaun estrada urbana.
“Lista ne’ebé tama barak liu komunidade nia moru, varanda maibe iha mos uma no edifisiu balun desde inisiu 2024 ekipa konjunta ba halo levantamentu tau tiha sinal atu labele kontinua obra, maibe balun kontinua nafatin, ida ne’e mos ita tenke tau antensaun, entaun ami sei bolu fila-fali hodi halo dialogu,” esplika Veneranda ba Jornalista sira nia edifisiu Autoridade Munisipal.
PAM Baucau afirma, kona ba prosesu indiminizasaun afetadu sira ne’e, kompetensia governu sentrál tamba Autoridade Munisipál laiha fundus hodi halo indiminizasaun.
“Se Nasionál dehan iha indiminizasaun tenke iha uniformidade ba komunidade afetadu sira, maibe Autoridade Munisipal la iha fundus ba indiminizasaun, liu-liu ba fatin sira ne’ebé ita hateten tiha ona labele kontinua, maibe komunidade obriga an kontinua” afima PAM.
Alende ne’e nia informa, dadaun ne’e iha ona regulamentu ordenamentu territorial Munisipál no estabelese grupu traballu local, hodi kontrola komunidade sira labele halo konstrusaun uma besik estrada, valeta leten, besik edifisiu publiku hanesan Eskola, Hospital no seluk, bainhira grupu traballu lokál deteta komunidade kontinua halo konstrusaun ba fatin ne’ebe bandu sei sobu.
Iha sorin seluk komunidade afetadu suku Bahú Rozito Belo dehan, prontu kontribui ba prosesu dezenvolvimentu atu sobu sira nia uma afetadu no kios, maibe Governu mos presiza halo indiminizasaun.
“Kona ba dezenvolvimentu ita hotu nia hakarak mak ne’e no ukun an nia objetivu mak ne’e, maibe programa no politika saida de’it ita ko’alia ba ema, entaun programa sira tun mai atu halo dezenvolvimentu presiza respeita ema, exemplu ema nia uma iha dalan ninin sobu tamba estrada kona, Governu tenke prepara kondisõens ruma, namdigas husik de’it hanesan ne’e,” dehan Rozito.
Iha tinan 2024 ekipa konjunta husi Autoridade Munisipal tau ona sinal ka markasaun mean ba komunidade nia uma-kios, moru, edifisiu privadu, maibe vila antiga balun seidauk sobu.
Entertantu liga ho asuntu ne’e, RCLM seidauk hetan konfirmasaun ho Kordenadór Destakadu Ministériu Obras Públika Baucau tamba, hala’o servisu balun iha Dili.
Ekipa Kobertura : RCLM
