RCLM Baucau (05-03-2026)—Projetu rehabilitasaun Sentru Maternidade Reamare iha suku Bahú, Postu Administrativu Baucau Vila, Munisipiu Baucau paradu.
Komunidade Jaime da Costa Martins hateten, hahú prosesu levantamentu ba infraestrutura eis sentru maternidade Reamare, hodi halo rehabilitasaun komunidade sira kopera tamba, atu hadi’a dezenvolvimentu área saúde nian hodi fó atendimentu besik ba komunidade.
komunidade suku Bahú ne’e observa, projetu rehabilitasaun eis Sentru Maternidade ne’e kompaña sobu kalen ne’ebe feruzen no taka balun ona, inklui janela ne’ebé aat hasai ona, maibe seida’uk reabilita hotu daudaun ne’e servisu paradu.
“Tamba saida mak derepente paradu,obra ne’ebé la’o atu hadi’a ita nia rai ka dezenvolvimentu ami kontente nafatin tau esperansa ba governu hadi’a para antende komunidade besik” hateten Jaime ba Jornalista iha Reamare kuarta (04-03-2026).
Prezidente Autoridade Munisipiu Baucau Veneranda Eurico Lemos Martins esplika, projetu rehabilitasaun Maternidade Reamare apoia fundus husi embaxador Portugál iha Timor-Leste no implementa husi UNFPA, maibe Autoridade Munisipál hapara tamba, kompanã halo servisu ba obra ne’e sobu kalen ne’ebé at no taka foun, maibe ai ne’ebé utiliza antigu fohuk ona maibe lasobu no subtitui foun.
“Ha’u rasik haruka para tiha kompaña nia servisu tamba, sira sobu kalen antigu no taka fali kalen foun maibe latroka ai, kuandu ha’u ho tekniku sira husi Munisipiu nian ba hare ai balun fohuk maibe sira tau fila-fali ai seluk hanesan ai-kabelak hodi kaer metin troku ne’ebé fohuk ona ne’e labele maske hau la’os tékniku, maibe la aseita,” dehan PAM Baucau.
Veneranda akresenta, antigu Sentru Maternidade Reamare halo rehabilitasaun hikas tenke garante nia kualidade, tamba projetu ne’e gastu orsamentu Dolár Amerikanu rihun neen nolu, atus ida rua nolu resin haat ($ 60,124.00), ne’ebe apoia husi embaxadór Portugál iha Timor-Leste.
“Maternidade ne’e antigu ema barak moris ne’eba inklui hau, se ita hakarak halo rehabilita tenke di’ak ho kualidade, tamba ita hakarak gasta osan ho di’ak no kualidade, no ita simu obra ho kualidade, maibe sé nafatin hanesan ne’e labele, tamba ne’e hau ko’alia ona ho tekniku UNFPA hare obra ne’e ho di’ak,” tenik Veneranda.
Lideransa Munisipál Baucau, husu kompaña sira ejekuta kualker obra sira implementa iha área jurídiku Baucau ,tenke responsabiliza ho kualidade nune’e iha sustentabilidade ba jerasaun sira.
Entertantu Rádio Komunidade Matebian Baucau la konfirma ho kompaña Valcander Unipesoal Lda, tamba laiha fatin implementasaun projetu.
Projetu rehabilitasaun Sentru Maternidade Reamare data servisu iha loron 28 fulan agostu 2025, no tuir planu to’o loron 28 fulan novembru 2025 finaliza ona, maibe to’o agora seidauk tamba servisu paradu.
Ekipa Kobertura RCLM
