RCLM Baucau (04/03/2026)—Hahu husi fulan Janeiru to’o mai iha fulan fevereiru tinan ne’e, Hospital Regional Eduardo Ximenes Baucau rejistu pasiente Dengue ne’ebe baixa hamutuk atus ida rua nolu resin ida, no husi numeru ne’e Labarik nain rua, feto ida no mane ida ho idade tinan neen mak lakon ona vida iha fulan fevereiru tinan ne’e.
Diretur Klinika HoREX Baucau Mouzinho Fransisco da Costa hateten, pasiente Dengue ne’ebe rejistu iha HoREX Baucau hamutuk atus ida rua nolu resin ida, maioria idade sanolu resin lima mai kraik, enkuantu nain tolu mak halo transferensia ba Hospital Nasionál Guido Valedares presija halo CT-Scan, tamba moras komplikasaun ne’ebe tama ona ba kakutak, enkuantu nain rua seluk mate tamba familia lori tarde ba faselidade saúde hodi halo tratamentu.
“Tuir epidemolija ne’ebe ami relata loro-loron servisu hamutuk ho saúde Munisipiu, durante fulan rua to’o dia 2 horseik, pasiente Dengue ne’ebe relata 166 maibe baixa deit iha HoREX Baucau hamutuk 121, no iha fulan fevereiru nia laran dengue oho pasien nain rua mak mate iha HoREX Baucau, nain rua seis anos hotu parte Postu Baucau vila nian”.hateten Diretur Klinika HoREX Baucau Mouzinho Fransisco da Costa iha nia knar fatin Horex Baucau (04/03/2026).
Diretur Klinika hatutan husu ba Komunidade sira, hodi servisu hamutuk ho Saúde Munisipiu atu halo prevensaun ba moras dengue, no husu mos ba komunidade sira tenke lori lalais pasiente ne’ebe iha sintomas Moras dengue ba faselidade saúde ne’ebe besik, hodi halo tratamentu tamba moras dengue mos perigu ba ema nia vida.
“Mensagen ba komunidade mak nafatin hamos ambiente, para evita susuk labele aumenta nia tolun, kuandu isin manas ona hakbesik an ba faselidade ne’ebe besik, moras dengue ita bele dehan perigu kuandu la ba lalais faselidade saude halo intervensaun tarde nune’e husu ba komunidade sira hetan ona sintomas isin manas, ulun moras, muta ita labele iha uma kleur besik ba faselidade saúde ne’ebe besik hodi halo tratametu”.
Tuir dadaus husi sistema Vizilansia Epidemologia Servisu Munisipál Saúde Baucau, hahu husi fulan Janeiru to’o mai iha fulan fevereiru tinan ne’e, rejistu pasiente dengue hamutuk 166 kuaze maioria rekopera ona no balun kontinua halo tratamentu, enkuantu dadaun ne’e Servisu Munisipál saúde Baucau, kontinua tama sai uma hodi fahe abate no halo fomigasaun hodi halo prevensaun ba moras dengue.
Ekipa Kobertura : RCLM
