RCLM Baucau (18/02/2026)—Kuarta feira Sinzas inisia Kuarezma, tempu penitensia, orasaun no Jejum ba kristaun sira hodi prepara an ba tempu paskua, tamba ne’e Bispu Diocese Baucau Dom Leandro Maria Alves, husu ba Sarani sira atu halo asaun karidade atu tulun maluk sira, kria paz no estabilidade hodi bele hetan salvasaun husi Maromak.
Amu Bispu hatutan tempu kuareza hanesan tempu ne’ebé sarani sira presija intesifika, halo relasaun diak ho Maromak liu husi orasaun, no husu labele han naan iha tempu Kuatra no sesta, tamba sarani sira presija halo refleksaun ba Jesus nia terus no mate.
“Kuarezma husu mai ita mak orasaun buka atu intensifika halo relasaun ho Na’i Maromak, buka atu hala’o ita nia orasaun ho Na’i Maromak orasaun signifika ita tama kontaktu ho Na’i Maromak, ita buka koalia ho Na’i Maromak, ida ne’e dalan ida ne’ebe mak lori ita atu hakbesik an ba Na’i Maromak no halo jejum ne’e husu mai ita hanesan sarani sira, liu husi ita nia jejum ne’ebe mak koalia liu iha santa kreda husu mai ita atu hamenus mos ita nia ai han sira, maibe jejum nee bolu atensaun mai ita atu hateke liu ba vida espiritual ninian, bolu ita ba klamar ninian, ida ne’e mak atu iha parte jejum ne’e relasaun ho abstenensia buka atu hakas an atu han ai-han ne’ebe oituan labele han naan iha loron kuarta ho sesta”. Dehan ba jornalista sira Kuarta feira, 18/02/2026 iha Igreija Katedral Diocese Baucau.
Entertantu Sarani Maria Luiza Freitas Fraga hateten, tempu kuarezma presija perdua malu no tulun malu atu nune’e bele hetan salvasaun.
“Ami agradese tebes oinsa iha tempu kuarezma ida ne’e ita perdua malu, nune’e ita bele hetan salvasaun, husi ita Na’i Jesus kristu nia terus tan ita ema nia sala, no ita mos halo asaun karidade iha tempu kuarezma ida ne’e”.
Misa kuarta feira Sinzas Prezide husi Bispu Diocese Baucau Dom Leandro Maria Alves, iha Paroquia Santo Ántonio Vila antiga Baucau, ne’ebe apoio husi Diakonu no Madre inklui katekista sira, enkuantu Misa ne’e hetan partisipasaun Masimu husi sarani sira.
