RCLM (17-02-2026)—-Projetu konstrusaun emerjensia moru protesaun mota, Suku Samalari Postu Administrativu Baucau vila, atinji ona 92%.
Enjinéru Kompaña ARQUIRIS Unipesoál Lda. no JV MAUCOO Construction Lda. Fladimir Nunes hateten, implementasaun projetu emerjensia moru protesaun iha mota Samalari hahú Fevereiru 2025, maibé seidauk finaliza tamba kestaun klima udan no korente mota boot, traballadór sira la bele aselera servisu maibé daudaun ne’e kontinua servisu no tuir planu sei entrega fulan uutubro tinan ne’e.
“Kona-ba projetu konstrusaun emerjensia moru protesaun iha mota Samalari to’o Fevereiru 2026 nia progresu to’o ona 92%, difikuldade mak problema natureza hanesan udan mota tun, ita presiza hein mota laiha tiha mak servisu” esplika enjinéru Fladimir iha Samalari.
Xefe Aldeia Samalari Estanisilão Fraga Ximenes no Komunidade Justinho Francisco Maria haktuir, antes seidauk konstrui moru protesaun iha mota Samalari, korente mota fó ameasa ba sira nia vida no estragus natar, maibé dadaun kompaña konstrui ona moru protesaun bele asegura ona sira nia moris no natar.
“Ami sente orgullu kompaña mai halo ona moru protesaun mota Samalari, tamba antes seida’uk halo tempu udan mota tun kalan ami toba sente ta’uk no trauma ho mota boot fó ameasa ba komunidade,” dehan Xefe Aldeia Samalari no Komunidade.
Projetu konstrusaun moru protesaun mota Samalari distánsia naruk 2.300 kilómetru, no as 3,90 metru governu liu husi Ministériu Obras Públika preve orsamentu millaun 3 resin ($ 3,966,308.35).
Ekipa Kobertura : RCLM
