RCLM (16-02-2026)—Komunidade husi Aldeia Buibau suku Buibau, Postu Administrativu Baucau vila, balun kontinua infrenta infraestrutura bázika bee-moos tamba, devitu bee menus.
Preokupasaun ne’e hato’o husi Xefe Aldeia Buibau suku Buibau Januario Ornai hateten, problema báziku komunidade sei infrenta kona-ba bee-moos, konsellu Suku trasa ba programa PNDS iha tinan 2022 halo ona perfurasaun bee-moos iha Suku, maibé laiha rezultadu no dadaun ne’e kompaña ne’ebé responsavel ba perfurasaun ne’e kontinua identifika fatin seluk área Suku Buibau, halo perfurasaun to’o ona metru 50 maibé seidauk hetan bee.
“Ami Autoridade hato’o komunidade sira nia aspirasaun ba leten, tamba bee-moos mak araska ba komunidade no halo ona perfurasaun bee-moos to’o ona 50 metru, maibe la hetan bee ne’ebé kompaña sei esforsu no resposabliza oinsá hetan bee fornese ba komunidade bele asesu,” dehan Xefe Aldeia Buibau Januario.
Xefe Aldeia afirma, dadaun ne’e komunidade ne’ebé seida’uk hetan kanalizasaun bee-moos, obrigadu tenke sosa husi empreza ne’ebé fa’an bee ho kareta listru 5.000 folin $15, hodi responde ba nesesidade kada loron.
“Ami balun asesu ona husi perfurasaun iha Igreja Buibau nian ne’e, balun tenke sosa bee husi empreza sira husi kota lama, tula mai ho folin 15 dolár ami uza seman rua foin sosa ense tan fali” hatete xefe Aldeia.
Komunidade Aldeia Buibau uma-kain hamutuk 160 asesu ona kanalizasaun bee-moos, husi rezultadu perfurasaun bee-moos husi PNDS faze primeiru iha área Igreja Buibau, enkuantu uma-kain hamutuk 160 mak seidauk asesu, tamba perfurasaun faze tuir mai seidauk hetan bee.
Ekipa Kobertura : RCLM
