RCLM (12-02-2026)—Governu liu husi Ministeriu Komérsiu Industria kinta ne’e, ofisialmente lansa fatuk dahuluk projetu konstrusaun foun merkadu munisipál Baucau, iha área Tua-Nau ho tema ”Merkadu Foun, Oportunidade Foun ba Dezenvolvimentu Ekonómia Lokál”.
Prezidente Autoridade Munisipiu Baucau Veneranda Lemos Martins, agradese ba Governu sentral liu-liu Ministeriu Komersiu Industria, tamba tau atensaun ba Munisipiu Baucau hodi halo konstrusaun merkadu Munisipal Modernu, ba negosiante sira utiliza ba atividade negosiu hodi kontribui ba kresimentu ekonomiku iha Munisipiu Baucau.
PAM Baucau afirma, dezenvolvimentu infraestrutura merkadu Munisipal Baucau, la’os de’it hare ba aspetu fíziku maibe konsidera pilár importante fundamentu ba kresementu ekonómiku nasionál, tamba ne’e husu ba empreza konstrutor, aselera servisu konstrusaun merkadu Munisipal Baucau hodi termina tuir data kontratu.
“Nonu governu konstitusionál nia tempu mak ita realiza fia-fali merkadu Munisipál ida ba negosiante sira atu bele hala’o sira nia negósiu atu fó sustentabilidade ekonomika ba ita nia Munisipiu, ohin ita sai testemuña ba lansamentu fatuk dahuluk konstrusaun merkadu Munisipal Baucau, ita mos husu empreza manan nain bele hahú halo merkadu ne’e lalais no tuir tempu,” dehan PAM Baucau liu husi nia intervensaun.
Ministru Komsersiu Industria Nino Pereira hateten, governu liu-liu Ministeriu Komersiu no Industria, iha dever atu kria merkadu Munisipal ne’ebe dignu ba negosiante sira, tamba merkadu sai nu’udar fatin konsentrasaun no transaksaun atividade ekonomia.
“Ita presiza kria merkadu ne’ebe dignu no merkadu ne’ebé asesivel, atu ema hotu asesu inklui maluk defisiente hodi hala’o atividade komersiu no atividade seluk,” dehan MKI.
Vise Primeiru Ministru Kordenador Asuntu Sosial no Ministru Dezenvolvimentu Rural no Habitasaun Mariano Sabio konsidera, Munisipiu Baucau sai sentru ba komersializasaun desde uluk kedas to’o ohin loron, tamba ne’e governu kria kondisaun minimu ba negosiante sira.
“Baucau ita sente orgullu, tamba Baucau ho Ermera no mos Bobonaro leten, mak símbolu komersializasaun ka bisnis desde uluk kedas to’o ohin loron, ne’ebe ita hakarak fo fatin ne’ebe dignu ba ita nia inan-aman sira, tur fatin ne’ebe di’ak hodi fa’an sasan seguru no saudavel,” hateten Mariano.
Diretor kompaña Suhurama Developer, Unipesoal Limitada Ricardo Cardoso Nehu hateten, nia parte selebra kontratu ho Governu implementa projetu merkadu Munisipal Baucau tinan rua, tamba ne’e hafoin lansamentu komesa hahu servisu, nune’e bele finaliza tuir data kontratu.
“Komesa ohin peletakan batu pertama no hahu ohin ita komesa halo servisu, maibe ita esforsu la to’o tinan rua hotu ona,” Diretor kompaña Suhurama Developer, Unipesoal Limitada promote.
Entertantu projetu konstrusaun merkadu Munisipal Baucau, governo preve orsamentu $ 7,139,218.43 ho durasaun kontratu tinan rua (13-11-2025-13-11-2027), ne’ebé implementa husi kontrator Fujian Yongtai Constration Group Co.Lda. Joint Venture ho Suhurama Developer,Unipessoal Lda.
Ekipa Kobertura: RCLM
