RCLM Baucau (06/02/2026)—Prezidente Autoridade Munisipiu Baucau Veneranda Lemos hateten, Durante tinan barak ema hotu hein hodi rehabilita estrada urbana, ikus mai Nonu Governu Konstituisional realiza duni nia esperansa, ohin Lansa ona fatuk dahuluk ba rehabilitasaun estrada Urbana Munisipiu Baucau.
PAM hatutan Munisipiu Baucau iha ona Dezenvolvimentu iha setor sira seluk hanesan Agrikultura, Saúde, Edukasaun maske seida’uk total, maibe neneik sei ba beibeik ida ne’e mak governu nia kompremisiu.
“Dezenvolvimenu neneik maibe bebeik, ida ne’e mak ita nia esperansa ba Baucau, mak governu ida ne’e iha nia obrigasaun, iha nia komprimisiu atu fo moris diak ba ita nia povo”. Dehan PAM Baucau Veneranda Lemos iha nia diskursu hafoin lansa fatuk dahuluk iha Vila Antiga Postu Administrativo Baucau Vila Munisipiu Baucau sesta, 06/02/2026
Entertantu Ministru Obras Publika Samuel Marçal hateten, husu ba sidadaun sira iha atu kopera no kolabora hodi governu bele halo mudansa ba dezenvolvimentu iha Munisipiu Baucau.
“Ita halo ho neneik halo ho koidadu, halo ho vizaun ida, hanoin ida, ho objetivu ida atu halo mudansa ba dezenvolvimentu iha Munisipiu Baucau, tamba ne’e husu ba ema hotu atu kopera no kolabora hodi hadia sidade sai nabilan liu tan”. Hateten Ministro Obras Publika Samuel Marçal.
Orsamentu ne’ebe mak atu halo ba rehabilitasaun ba estrada Urbana Munisipiu Baucau ho kilometru 23, hamutuk Milaun 8 resin iha ne’ebe kompaña rua mak asina kontratu, mak hanesan kompaña Jova Construction Unipesoal.Lda no Kompaña Vage’el Unipessoal Lda.
Lansamentu ne’e ofisialmente husi Primeiro Ministru Kay Rala Xanana Gusmão, akompaña husi reprezentante Membru Governu, Parlamentu Nasionál, Religiosos, Veteranu no populsaun Munisipiu Baucau.
Ekipa Kobertura : RCLM
