RCLM Baucau (05-02-2026)—Komunidade Suku Loilubu Postu Administrativu Vemasse Munisipiu Baucau, infrenta problema ba bee-moos no husu Autoridade kompetente atu solusiona.
Komunidade suku Loilubu Bernardino da Costa Pereira informa, sira infrenta problema bee-moos iha fulan dezembru tinan kotuk to’o agora, tamba la hetan bee ne’ebé kanaliza antes.
Nia afirma atu hetan netik bee hodi responde ba nesesidade kada loron, sira ne’ebe iha kbi’it finaseiru aluga kareta hafoin tula bee-moos iha suku vizinus, hodi responde ba nesesidade familia, maibe komunidade ne’ebe la iha kbi’it finaseiru kuru iha bee matan, la’o ain kilometru tolu.
“Ami komunidade Loilubu araska ba bee, ne’ebé hotu-hotu ba bee matan mos dok, ita mos aluga kareta ba hola fali bee iha suku seluk sustenta netik nesesidade loro-loron nian, maibe aluga selu ketak kareta ba fali Ostico, ema bee privadu entaun, ita sosa pulsa 5 dolár kareta fó 10 dolár hamutuk 15 dolár, maibé uza la to’o fulan, tamba uza ba nesesidade barak, tein, haris fase roupa, haris fatin ne’ebé uza to’o semana ida de’it,” hateten komunidade Loilubu.
Reprezentante Komunidade husi aldeia tolu Suku Loilubo, ejize Autoridade kompetente sulusiona problema ne’ebé dadaun sira infrenta kona-ba laiha bee-moos.
“Ami nia ejizensia ba Autoridade hodi hato’o SAS rezolve lalais bomba aat, atu nune’e komunidade husi Suku asesu fila ba bee,” Bernardino husu.
Xefe Suku Loilubu Joanico da Costa Freitas rekoiñese, komunidade agora enfrenta hela problema bee-mos tamba, makina avaria hodi labele fornese bee-moos ba suku Loilubo tomak.
“Agora dadauk bee iha suku Loilubu bee matan ida de’it naran wai-watule ninia asesu ba aldeia tolu uluk, ita halo kanalizasaun husi World Vision iha tinan 2014 mai to’o agora foin dadauk fulan Dezembru makina bomba avaria, agora komunidade problema ba bee-moos ne’e sai preokupasaun bo’ot,” hateten Xefe suku Loilubo
Lideransa komunitariu ne’e hatutan, esforsu ne’ebe konsellu suku halo utiliza orsamentu PNDS tinan 2025, hodi sosa makina foun tempu besik sei monta fila-fali hodi fornese bee-ba komunidade.
“Agora Autoridade buka esforsu nafatin tenta ba kompaña ne’ebé responsavel ba bomba ne’e, lori lalais mai tau fali ba bee matan, atu ita nia komunidade uza fali,”Nia afirma.
Entertantu Suku Loilubu kompostu aldeia tolu hanesan Caitaranau, Nunoti no Uaidau, total populasaun hamutuk 1.786.
Ekipa Kobertura : RCLM
