RCLM (04-02-2026)—Kompaña konstrutór Nelfeh limitada planeia entrega uma unidade rua ba pesoál saúde Ossoqueli iha suku Loilubu, Postu Administrativu Vamasse Munisipiu Baucau iha fulan fevereiru ne’e tamba atinji ona 99%.
Enjinéru Tékniku kompaña Nelfeh limitada Juvencio da Costa Boavida informa, pregresu fíziku konstrusaun uma ba pesoál Saúde konklui ona, dadaun ne’e parte kompaña sei sosa fasilidade uma laran hanesan mobiliariu inklui asesores seluk, atu kompleta hafoin halo relatóriu finál hodi entrega fulan ida ne’e nia laran.
”Progresu atu tama 100% hein sasan balun ne’ebé ami seidauk kompleta hanesan kurtina, kadeira balun konta fulan ida ne’e hatama relatóriu atu entrega,” informa Enjineiru Tékniku kompaña Nelfeh limitada ba Jornalista iha Sentru Saúde Osso Queli Suku Loilubu.
Xefe Suku Loilubu Joanico da Costa Freitas apresia kompaña implementador projetu uma ba pesoal saúde Ossoqueli, tamba hatudu kualidade no tuir dezeñu.
“Durante Autoridade nia akompañamentu obra kualidade tebes tuir padraun husi Ministériu Obras Publiku no BoQ ne’ebé halo,” dehan Xefe Suku Loilubu.
Médiku Sentru saúde Ossoqueli Isabel da Costa Magalhães agradese ba Governo, tamba konstrui ona uma ba sira atu fó atendementu besik liu ba komunidade ne’ebé moras.
“Agradese tebes ita nia Autoridade iha netik intensaun bá ami Pesoál Saúde sira hela dok bele hela besik tamba sira mai dos asidente sira ne’e ita la espera,” dehan Médiku
Konstrusaun uma ba Pesoal Saúde iha Sentru Saúde Ossoqueli kada uma ida kuartu rua, sala bainaka, haris fatin, sala dapur no kompleta fasilidade uma laran hanesan kama, armariu, kadeira, meza no fasilidade seluk.
Entertantu projeitu ne’e implementa husi programa dezenvolvimentu integradu Munisipál tinan 2025 ho orsamentu liu rihun atus ida sanolu resin haat ($114,999.40).
Ekipa Kobertura : RCLM
