RCLM (30-01-2026)—Organizasaun Noun Governamental Asisténsia Legál ba Feto no Labarik (ALFeLa) rejista kazu violénsia hasoru feto no labarik feto iha Munisípiu Baucau hamutuk 78 durante tinan 2025.
Diretora Ezekutiva ALFeLa Marcelina Amaral hateten, kazu violensia hasoru feto no labarik feto hamutuk 78 ne’ebe ALFeLa fo asistensia, husi Munisípiu Baucau kompostu tipu kazu violensia domestika, violasaun seksuál, abuzu seksuál ba minóridade no seluk tan, maibe maória aprezenta ona ba Ministériu Públiku no kontinua ba tribunal hodi foti desizaun.
“Kazu sira ohin ko’alia Baucau nian 78 no Munisipiu sira seluk maiória prosesu ona iha nivél Ministériu públiku, maória kazu violénsia doméstika, violasaun seksuál, abuzu seksuál ba minor ne’e kuaze iha Timor laran tomak, tantu Baucau, Díli ka Munisipiu hotu-hotu, kiik liu ofensas simples no kazu abandona menór,” dehan Diretór Ezekutiva ALFeLa ba Jornalista sira hafoin remata lansa fatuk dahuluk konstrusaun edifísiu ALFeLa rejionál iha vila Nova Baucau sesta ne’e.
Diretora Ezekutiva ne’e esplika, kazu violensia hasoru feto no labarik feto kontinua rejista kada tinan tamba, sidadaun pesoál balun menus informasaun atu respeita feto sira, fatór seluk sidadaun balun uza media sosial la tuir dalan los hodi hamosu violénsia domestika iha família.
“Ami husi parte ALFeLa papél prinsipál hakarak ajuda ka apoia legál ba vítima feto ho labarik sira, atu bele hetan sira nia direitu asesu ba justisa ne’ebé justu no laiha diskriminasaun ba nivél prosesu hotu,” nia hatutan.
Entertantu tinan 2025 ALFeLa rejista kazu violénsia hasoru feto no labarik feto iha teritoriu Nasionál hamutuk 578, husi númeru ne’e tribunál fó ona desizaun hamutuk 200 resin no restu sei iha prosesu tuir dalan legál.
Ekipa Kobertura :RCLM
