RCLM (30-01-2026)—Organizasaun noun Governamental Asisténsia Legál ba Feto no Labarik (ALFeLa) hamutuk ho Reprezentante Autoridade Munisipiu Baucau sesta ne’e hatur fatuk dahuluk ba konstrusaun edifísiu iha área Vila Nova-Watulete, Suku Tirilolo, Postu Administrativu Baucau Vila, Munisipiu Baucau.
Diretora Ezekutiva ALFeLa Marcelina Amaral hateten, organizasaun ALFeLa existe ona durante tinan rua-nulu (20), hodi hala’o papél fornese asisténsia legál ba feto no labrik feto ne’ebé hasoru kualker krime hodi asesu ba justisa formál , maibe iha Baucau la iha edifísiu própriu ne’ebé sai sentru ba Rejiaun Leste. Tamba ne’e liu husi Embaixador Novazelandia iha Timor-Leste oferese apoiu finaseiru ho total $ 28,000,00 ba ALFela hodi konstrui edifisiu foun.
“Hare ba Vítima Inan Feto no labarik ki’ikoan sira presiza fatin no espasu seguru. Durante ne’e ALFeLa fatin ki’ikoan ida ne’ebé hamutuk ho PRADET (Baucau) servisu apoiu ba vítima sira ho MSSI fornese asistensia legál ho papel servisu sosiál gratuita ba vítima feto no labarik. Uma Baraka oan ne’e iha futuru sai hanesan edifísiu ALFeLa ne’ebé kolega staf legál fó konsellu legál ba vítima sira no iha espasu seguru ba vítima sira ne’ebé hakat mai office, no mos liu-liu ba parseiru rede referál sira se karik iha kazu komplikadu ita presiza espasu atu halo diskusaun, enkontru gestaun kazu, enkontru konferensia kazu no rede referál ALFeLa nia odamatan nakloke,” dehan Diretór Ezekutiva ALFeLa liu husi intervensaun iha serimónia hatur fatuk dahuluk konstrusaun edifísiu ALFeLa iha vila Nova Baucau.
Sekretaria Administrasaun Munisipal asuntu sosial no Organizasaun Maria Celestina Viegas konsidera, konstrusaun edifisiu ALFeLa iha Baucau importante tebes, tamba staf sira bele utiliza hodi fo asistensia legal ba feto no labarik feto hetan violensia iha sosiedade.
Reprezentante Autoridade Munisipal Baucau iha esperansa, prosesu konstursaun edifisiu ne’e la’o tuir dezeñu BOQ no finaliza data kontratu to’o fulan neen.
“Ha’u fi’ar katak projetu ba uma ida ne’e la’o tuir dezeñu ne’ebé ita boot sira (ALFeLa) planeia ona, ita hotu agradese nafatin ba ajénsia sira ne’ebé durante ne’e apoiu, hatudu nafatin ita boot sira nia protidaun no atendementu ne’ebé di’ak ba komunidade sira hetan violensia domestika no violensia sira seluk ne’ebe akontese iha ita nia Munisipiu,” Reprezentante Prezidente Autoridade Munisipiu Baucau ne’e fó hanoin.
Entertantu konstrusaun edifisiu ALFeLa iha Baucau ho medida métro 9×10, durasaun servisu fulan neen. Serimónia lansamentu fatuk dahuluk ne’e hetan partisipasaun husi reprezentante Autoridade Munisipiu, PNTL seksaun Polisia Unidade Vuneravel (VPU), Xefe suku Tirilolo, inklui organizasaun rede referál seluk ne’ebe existe iha Munisipiu Baucau.
Ekipa kobertura : RCLM
