RCLM Baucau (27/01/2026)—Autoridade Munisipiu Baucau liu husi ekipa jestaun merkadu no guarda Munisipiu hamutuk ho PNTL muda Obrigatoriu negosiante 36 ne’ebe hala’o negosiu iha sede suku bahu nia oin, iha Postu Administrativo Baucau Vila Munisipiu Baucau.
Xefe Ekipa Konjunta Eduardo Filipe Ximenes Hateten ekipa konjunta muda obrigatoriu negosiante sira ba iha merkadu municipal, tamba okupa fali espasu publiku area sede suku Bahu nian tamba sede suku ne’e atu halo atemdimentu ba Komunidade, laos atu halo fali aktividade komersializasaun nian.
Eduardo hatutan Autoridade Munisipal nia politika ba akitividade negosiu iha Vila Antiga no Vila Nova inklui okupa espasu publiku tenke konsentra iha merkadu munisipal, enkuantu negosiante sira ne’ebe mak kontinua halo negosiu iha fatin ne’ebe Autoridade Munisipiu bandu, parte ekipa sei kontinua hasai obrigatoriu husi fatin refere.
“Ohin ita halo muda obrigatoriu vendedores sira ne’ebe mak ita muda ona iha semana kotuk, vendedores sira ne’e ita muda ba dala tolu ona iha inisiu kuandu ita muda vendedores husi vila antiga no vila nova inklui mos sira, maibe sira hateten katak preokupasaun mak fatin ne’ebe mak ita distimasaun ba sira ne’e seidauk ateru tamba ne’e maka sira labele muda, maibe iha tinan kotuk ne’e Autoridade Munisipal esforsu ita ateru hotu ona fatin ne’ebe mak distinasaun vendedores sira iha vila antiga tamba ne’e mak iha kinta semana kotuk liu ba ekipa tun ba avizu fo hanoin hatete bebeik sira katak sira ida idak ba hare tiha ona sira nia fatin iha merkadu municipal, tamba ne’e mak ita muda obrigatoriumente ba iha merkadu municipal, maibe sira aseita katak sira sei la ba merkadu maibe ida idak fila ba nia uma teki teki sira ba okupa fila fali espasu publiku iha sede suku nian area ne’e labele, sede suku ne’e atu fo atendimentu publiku ba populasaun sira laos sede suku ka areadores suku ne’e sai fila fali fatin ba komersializasaun”. Dehan Xefe ekipa Konjunta iha edifisiu Autoridade munisipiu Baucau, tersa 27/01/2026
Xefe Ekipa Konjunta husi autoridade munisipiu Baucau husu ba negosiante sira atu kopera ho autoridade munisipiu Baucau, hodi halo aktividade komersial hotu hotu konsentra iha merkadu Munisipal.
“Inan aman sira maun alin sira ne’ebe mak faan sasan sira areadores iha espasu publiku husu para atu kopera autoridade munisipal ita iha merkadu munisipal ne’ebe sufsiente hela iha tinan ida ne’e duni mos ita sei halo konstrusaun ba merkadu ne’ebe ke ita kategoria hanesan merkadu modern, iha tinan ida ne’e duni lakleur tan ita sei halo lansamentu tamba ne’e aktividade komersializasaun hotu hotu tenke konsentra iha fatin ida maka merkadu munisipal la iha espasu ida ne’ebe sira bele okupa atu halo fali aktividade seluk”.
Relasiona ho ekipa konjunta ne’ebe muda negosiante sira ho obrigatoriu, parte jornalista tenta atu konfirma ba negosiante sira no Xefe Bahu maibe rejeita fo komentariu.
Ekipa Kobertura : RCLM
