RCLM Baucau (17/06/2025)—Xefe Sentru Saude Tirilolo Luisa da Costa Belo hateten, rejultadu atinjimentu ba dadus moras iha sentru saúde Tirilolo, hahu husi fulan janeiru to’o mai fulan maio tinan ne’e, rejistu moras ne’ebe aas mak moras ISPA hamutuk rihun lima atus lima resin, moras diareia hamutuk besik atus neen no Pneomonia hamutuk atus hat sanolu resin lima, kompostu husi tinan 10 to’o neen nolu, enkuantu tinan lima mai kraik mak dominina iha moras tolu ne’ebe aas iha sentru saude Tirilolo Baucau.
Nia hatutan moras ISPA, Diareia no Pneomonia, kontinua sae iha sentru saude no postu saude sira, tamba kauza husi ambiente la mos, hahan la igene no inklui rai rahun maka’as.
“Hau hare moras tolu ne’e ligasaun ne’ebe mak hanesan ne’ebe bele fo moras ISPA, Diareia, no Pneomonia, primeiru ita hare nia kauza nee mai husi iklima ne’ebe troka halo rai rahun maka’as,no liu liu ita nia ambiente ne’ebe mak ladun mos, ai han ne’ebe la mos ida ne’e mal lori moras sira ne’e sempre sa’e maka’as iha sentru saude sira ne’e”. Dehan Xefe Sentru Saude Tirilolo Luisa da Costa Belo ba jornalista RCLM Baucau Tersa Feira ne’e (17/06/2025)
Xefe sentru saúde hatutan, kontinua hala’o aktividade promosaun liu liu fahe informasaun ba komunidade sira suku no aldeia, kona ba oinsa atu halo prevensaun ba moras hirak ne’e.
“Ami nafatin aproxima liu husi aktividade promosaun saude kona ba oinsa mak sira bele halo prevensaun ba moras sira ne’e, maibe dala barak ita nia komunidade sira ne’ebe mak rona maibe la halo tuir no fatin ne’ebe sira hela risku ba rai rahun hodi fo moras ba sira no balun seidauk iha konsensia hodi soe foer iha nia fatin, ida ne’e mak sei lori moras sira sempre mosu ba komunidade sira”. Haktuir Luisa
Enkuantu ai moruk iha sentru Saúde Tirilolo Baucau sufsiente hela hodi atende ba pasiente sira ne’ebe hala’o tratamentu saúde.
Ekipa Kobertura : RCLM
