RCLM Baucau (20-01-2026)—Implementasaun programa Merenda Eskolar tuir matadalan fornese produtu lokál to’o 75%, maibe iha Munisipiu Baucau seidauk atinji to’o tarejetu ne’e tamba produtu lokál menus.
Diretor Servisu Munisipál Edukasaun Baucau informa, bazeia ba matadalan implemtasaun programa merenda escolar, fornesementu ai-han ba estudante sira 25% produtu importasaun no 75% produtu lokál rai laran, maibe la atinji to’o tarjeitu ne’e foin to’o 25% tamba produsaun produtu lokál sei menus.
“Ita la atinji ki’ik liu tamba ita hare bazeia ba produsaun sira iha terenu la to’o ne’ebé ita esforsu nafatin nivel Munisipal ho Prezidente Autoridade hamoris grupu agrikultores sira no fó motivasaun, informasaun ba komunidade sira bele oferese produtu lokál ne’e ba grupu fornesedor,” dehan Diretor Servisu Munisipál Edukasaun Baucau ba Jornalista sira hafoin lansa merenda eskolar tinan 2026 nivel iha EBC 03 vila nova.
Fatin hanesan Sekretaria Munisipal Asuntu Sosiál no Organizasaun Maria Celestina Vegas enkoraja komunidade produz protudu lokál kuantidade bo’ot, nune’e ekipa jestaun programa merenda eskolar sira sosa hodi utiliza ba Merenda Escolar.
“Atu atinji 75% presiza ita hotu nia apoiu moral no hanoin di’ak sira hato’o ba ita nia komunidade sira prepara nafatin ai-han lokál sira nune’e fornese ba ekipa jestaun merenda eskolar bele uza duni hahan lokál sira fó han ita nia oan sira,” reprezentante Prezidente Autoridade Baucau fo hanoin.
Entertantu ménu merenda eskolar produtu lokál mak hanesan fos lokál, hudi, manu-tolun, na’an no hahan lokál seluk.
Ekipa Kobertura : RCLM
