RCLM Baucau (20-01-2025)—Autoridade Munisipal Baucau hamutuk ho servisu Munisipal Edukasaun tersa ne’e halo lansamentu programa merenda eskolar tinan 2026 nivel municipal, ne’ebe realiza iha Eskola Baziku Sentral 03 Vila nova Postu Administrativu Baucau vila.
Iha lansamentu ne’e Sekretariu Munisipal Asuntu Sosiál no Organizasaun Maria Celestina Viegas esplika, tuir planu Autoridade Munisipiu hamutuk ho Servisu Munisipal Edukasaun implementa programa merenda eskolar kada eskola iha loron 12 fulan ne’e, maibe lakonsege tamba presiza dadus estudante ne’ebé benifisia ho konkretu, alende ne’e halo kordenasaun ekipa jesaun merenda escolar (EJPE), tamba ne’e adianta to’o loron 20 foin halo lansamentu.
Reprezentante Prezidente Munisipal hatutan, implementasaun programa merenda eskolar ho intensaun haforsa enerjia kada estudante pre-eskolár to’o ensinu baziku, nune’e iha vontade partisipa ativu prosesu aprendisazem ne’ebé profesores sira hanorin.
“Iha tinan 2024 ita hahu iha marsu, 2025 ita hahú 3 fevereiru mai 2026 ita koko atu hahu 12 janeiru maibe lakonsege tamba ita presiza dadus nomos buka ekipa jestaun ba merenda eskolar nia protidaun oinsá apoiu Autoridade Munisipiu Baucau ejekuta orsamentu ba merenda eskolar tinan 2026 no oinsá bele tau atensaun ba merenda eskolar ba ita nia oan sira,” dehan Sekretariu Munisipal Asuntu Sosiál no Organizasaun liu husi intervensaun iha Salaun EBC 03 vila nova Tersa ne’e.
Diretor Servisu Munisipal Edukasaun Baucau Afonso dos Santos da Costa afirma, programa merenda eskolar tinan ne’e sedu tamba ejekuta saldu orsamentu tinan 2025 ho montante rihun hitu nolu resin ba loron lima nian, hafoin kontinua ezekuta orsamentu tinan 2026 nian.
“Orsamentu iha saldo 2025 nian tempu atu fó fila kofre estadu seida’uk to’o ne’eba orsamentu anu fiskál mos mai ona, ami prepara ona pedidu no kontratu atu hatama entaun ami kalkula orsamentun ne’e iha tempu atu fó fila, entaun orsamentu sira hela ami fahe ba EJPE sira implementa loron 20 ohin,” dehan Afonso.
Implementa programa merenda eskolar durante trimestre primeiru to’o kuartu tinan 2026 loron efetivu hamutuk 150, no estudante husi Pre-eskolar to’o ensinu baziku iha teritoriu Baucau ne’ebe benifisia hamutuk liu rihun tolu nolu resin haat.
Enkuantu orsamentu merenda eskolar tinan ne’e governu liu husi Ministeriu Administrasaun Estatál preve ba Autoridade Munisipal Baucau no servisu Munisipal Edukasaun, atu ejekuta hamutuk dolar amerikanu miliaun rua resin ($ 2,788,690).
Ekipa Kobertura: RCLM
