RCLM Baucau (16-01-2026)—Autoridade Munsipál Baucau sei ejekuta orsamentu jerál estadu (OJE) tinan 2026, husi kategoria kapitál dezenvolvimentu hamutuk miliaun $ 2,310,213 ba Programa Dezenvolvimentu Integradu Munisipal (PDIM).
Prezidente Autoridade Munisipiu Baucau Veneranda Eurico Lemos Martins hateten, projeitu husi PDIM hetan aprovasaun hamutuk 29 ne’ebé foka ba infraestrutura, setór edukasaun no Saúde.
PAM afirma maske projeitu 29 antes ne’e aprovadu maibe Autoridade Munisipiu sei halo fali exersisiu internalmente tamba, projeitu husi área edukasaun no saúde proto tipu.
“Sé protu tipu ami kortes lubuk ida husi nasional entaun ami tenke hare fila fali protu tipu sira ne’e mai kedas husi ninia dezeñu hanesan no ninia implementasaun no orsamentu difirente, entaun husi 29 projeitu ne’e ami tenki halo fila fali exersisiu para bele kobre ba Ministeriu Edukasaun ho Ministeriu Saúde ninian ne’ebé agora sei iha implementasaun espera katak semana oin mai planu aprovizionamentu tama hotu ona projeitu hira mak atu implementa,” hateten Veneranda ba Jornalista sira iha Administrasaun Munisipál vila nova Baucau kinta (15-01-2026).
Entertantu osan kapitál dezenvolvimentu miliaun rua resin ne’ebé sei ezekuta ba projeitu PDIM foka ba konstrusaun edifísiu eskola, uma ba Profisionál Saúde, alende ne’e sei konstrui mos uma ba profesores, kanaliza bee-moos, halo zardim, estrada ho eskalaun ne’ebé bele responde iha Postu Administrativu sira.
Ekipa Kobertura : RCLM
