RCLM (15-01-2025)–Autoridade Munisipál Baucau (AMB) halo ona distribuisaun envolope pakote fiskál ba ezekusaun orsamentu jerál estadu(OJE) tinan 2026, ho montante $ 13,802,085 ba Diretór Servisu Munisipál no Administradór Postu Administrativu ualu.
Prezidente Autoridade Munisipiu Baucau Veneranda Eurico Lemos Martins esplika, ezekusaun orsamentu no implementasaun programa tinan ida ne’e aprovadu bazéia ba planu kada servisu Munisípál no administrasaun Postu Administrativu sira, tamba ne’e husu tenke ezekuta ho kualidade no responsabilidade nune’e benifisia ba povu iha báze.
“Tinan ida ne’e hau bele dehan rigor oituan ba implementasaun orsamentu nomos programa sira ne’ebé aprovadu hotu ona, tamba ne’e presiza diretor ida-idak no Administradór Postu Administrativu sira hatene sira nia orsamentu ba kada diresaun ne’ebé sira rasik mak propoin, tamba ne’e tenke kumpre atu implementa ezekusaun orsamentu ho di’ak nomos kualidade,” dehan Veneranda ba Jornalista sira iha nia kna’ar fatin Administrasaun Munisípál Baucau kinta ne’e, hafoin remata distribuisaun envelope fiskál OJE 2026.
PAM Baucau afirma, orsamentu tinan 2026 ba Munisípiu Baucau aprovadu iha Parlamentu Nasionál no hetan promulgasaun husi Prezidente Repúblika hamutuk $ 13,802,085 kompostu kategória lima mak hanesan saláriu no vensementu, bens no servisu, tranférensia públika, kapitál menór no kapitál dezenvolvimentu aumenta kompara tinan 2025 ho montante miloes 12 resin.
“Orsamentu ita husu anteriormente kuaze 12 miloes itál maibe ita hetan 13 miloes itál maibe nemos sai sasukat ida ba ita nia kapasidade implementasaun tamba ita boot sira akompaiña karik iha projetu tolu ka haat ida seidauk hotu ida mos kontribui ba ita nia ezekusaun maibe mekanizmu ne’ebé administrasaun Munisipál halo kordenasun ho Ministériu Administrasaun Estatál no Ministériu Finansa ita halo kompañia sira tenke garantia iha bankaria ita bele foti osan sira ne’e hotu tau iha banku atu sira nia projetu remata sira bele asesu ba orsamentu ne’ebé ita husu hela ,”Veneranda esplika.
PAM akresenta maske projetu tinan 2025 ba kotuk balun seida’uk finaliza maibé sente orgullu tamba progresu ezekusaun orsamentu iha Autoridade Munisipiu Baucau atinji to’o 97%, kompara tinan 2024 to’o de’it 89%.
“La’ós dehan ladi’ak, di’ak hotu maibe atu di’ak liu ita atinji to’o 90 itál porsentu, tamba ne’e ohin ami konvida hotu Diretor no Administradór sira hotu mai atu sira hatene kada primeiru trimestre sira tenke aprezenta ona ezekusaun orsamentu kada persentajen hira tamba ne’e sira tenke atentu maibe hau kontente tamba iha 18 agora (fulan ida) ami serbisu tinan rua mandatu hare ba hot-hotu nia serbisu dedikasaun tebes,” Nia konklui.
Fatin hanesan Administrador Postu Administrativu Quelicai Paul Jacinto Morreira informa, orsamentu tinan fiskál 2026, Administrasaun Postu Quelicai propoin ba Autoridade Munisípiu no enkamina ba governu sentrál hamutuk $ 75,173,00, maibé laiha kortes tamba ne’e agradese no kompremitidu sei ezekuta bazéia ba planu ne’ebé trasa no orientasaun husi autoridade Munisípiu.
“Agradese ba Autoridade Munisipiu Baucau no governu sentrál aprova orsamentu ba postu Quelicai iha rihun 75,173,00 kategoria bens no servisu no saláriu vensementu, tamba ne’e hanesan Autoridade Postu sei ezekuta tuir regras no orientasaun Prezidente Autoridade Munisipiu Baucau nian,” hateten APA Quelicai.
Entertantu OJE 2026 aloka mai Munisípiu totál $ 13,802,085 kompostu kategória lima hanesan saláriu no vensementu, ho montante $ 2,850,742, bens no servisu $ 765,550, tranférensia públika $ 7,725,580, kapitál menór $ 150,000 no kapitál dezenvolvimentu $ 2,310,213.
Ekipa kobertura : RCLM
