RCLM (14-01-2026)—Eskola Baziku Filial Vila Nova Iha Postu Administrativu Baucau vila menus manorin tamba balun reforma ona iha fulan dezembru tinan 2025, maibe Ministeriu Edukasaun seidauk subtitui.
Kordenador Interina EBF Vila Nova Baucau Veneranda Arcanjo de Jesus hateten, manorin husi eskola EBF vila nova reforma obrigatoriu tamba idade liu neen nolu resin lima na’in ualu, maibe too agora seidauk koloka fali manorin bolsu kandidatu foun atu subtitui.
“Ami nia difikuldade iha ne’e profesor lato’o tamba na’in ualu reforma ona entaun profesor reduz ona, estudante sala rua tau hamutuk sala ida foin hanorin maibe liu tiha standar ne’ebé ministeriu haruka mai,” dehan Kordenador Interina EBF Vila Nova Baucau.
Nia fundamenta relasiona seidauk koloka manorin bolsu kandidatu difikulta prosesu aprendisazem, tamba ne’e rekomenda atu koloka manorin nain ualu hodi subtitui manorin nain ualu ne’ebe reforma ona.
“Na’in ualu mak sai entaun haruka fali nain ualu mai troka fila-fali atu nune’e bele hamenus ami nia problema infrenta iha eskola ida ne’e,” Kordenador Interina rekomenda.
Entertantu manorin iha EBF vila nova antes ne’e iha na’in tolu nolu, maibe na’in ualu reforma ona iha fulan dezembru tinan 2025 no dadaun hela rua nolu resin rua, nune’e lasufisiente atu hanorin estudante hamutuk rihun ida.
Ekipa Kobertura : RCLM
