RCLM Baucau (13/01/2025)—Iha tinan rihun rua rua nolu resin rua Governu instala no Inagura Sala ICU iha Hospital Regional Eduardu Ximenes Baucau, maibe to’o agora seidauk utuliza.
Diretur Ezekutivo HoREX Baucau Claudino Ximenes rekoñese sala ICU seidauk utuliza to’o agora tamba falta rekursu humanu ba espesialidade no enfermeiru no mediku jeral sira, maske dadaun ne’e, iha HoREX Baucau mediku no enfermeiru nain sanolu resin rua ne’ebe treinadu ona hodi koloka ba ICU, maibe sei fo impaktu ba sala sira ne’ebe sira servisu ba.
Claudino Ximenes hatutan, relasiona ho prosesu rekrutamentu iha tinan kotuk parte HoREX Baucau propoin rekursu humanu balun ba Dirasaun Nasional Ministeriu Saúde, maibe lakonsege aprova iha ne’ebe Ministeriu Saúde sei haruka ema nain sanolu resin hitu ba HoREX Baucau kompostu husi enfermeiro, parteira inklui mediku.
“Sala ho nia ekipamentus sira kuaze tinan tolu ona iha oitavu governu ne’e mai inagura tiha iha 2022 ami hein deit rekrutamentu ami nia dirasaun anterior propoin hato’o mais lakonsege rekursu humanus ne’e mai, mai fali dirasaun ida ne’e mos ami esforsu nafatin maibe lakonsege rejolve, foin dadauk fulan novembru dezembru ne’e, Ministeriu Saúde loke vaga ne’e ita mos propoin ba ema sira ne’ebe ligadu ho ICU nian ne’e, espera katak ema sira kuantidade ne’ebe ohin hau temi sira bele mai finalize iha fulan janeiru ita bele hahu loke ona sala ICU, to’o agora ita seidauk utiliza ne’e tamba rekursu humanu la iha”. Dehan Diretur Ezekutivo HoREX Baucau ba jornlaista sira Segunda, 12/01/2026.
Entertantu Familia Pasiente Carlos sarmento hateten, sala ICU ne’e importante tebes ba pasiente sira maibe to’o agora seidauk utuliza, tamba ne’e husu ba Ministeriu Saúde atu funsiona sala ICU ne’e.
“Tuir observasaun ne’ebe mak hau hare sala ICU ne’ebe preparadu tiha ona maibe seidauk funsiona, dala ruma rekursu humanu mak seidauk iha ga tamba saida buat sira ne’e seidauk la’o, sala preparadu tiha ona agora oinsa atu faselita pasiente sira seluk ne’ebe maka emergensia liu ne’ebe maka grave liu lolos ne’e tenke uza ona tenke funsiona, maibe tuir hau nia hare ne’e tuir observasaun karik ita nia rekursu humanu mak la iha ga? fatin ne’e seidauk funsiona”. Dehan familia pasiente
Ekipamentus ne’ebe mak dadaun ne’e iha sala ICU mak hanesan Ventilator, monitor, saksimpam, serinpam, kama no inklui ekipamenus ne’ebe ligadu ho tratamentu intensive nian.
Ekipa Kobertura : RCLM
