RCLM Baucau (13-01-2026)—Nogosiante sambaku no nú maran iha merkadu Tuanau Baucau halerik ba rendimentu, tamba menus komprador atu sosa sira nia sasan.
Negosiante Ana Maria Gusmão hateten, durante fa’an produtu lokál nú maran la hetan rendimentu tamba merkadu Tunau dok husi komunidade, alende ne’e estrada vila nova ba merkadu dadaun ne’e aat difikulta mikrolete tula komprador atu sosa sira nia produtu lokál.
“Loron boot (natál tinan foun) ha’u hetan $20 dolár, loron bailet hau tur iha ne’e ema la sosa hau fila de’it ba uma, tamba merkadu pinda mai ne’e dok husi komunidade estrada mai ladi’ak,” negosiante Ana Maria hato’o preokupasaun ne’e ba Jornalista sira iha Merkadu Tuanau.
Nia akresenta, inisia halo atividade negosiante kreditu osan ho intensaun hetan rendimentu no lukuru sustenta nesesidade familia no selu oan sira nia eskola, maibé la hetan rendimentu.
“Hau fa’an sasán kreditu hodi selu oan nia eskola maibe ema la sosa sasan, osan laiha atu selu kreditu no oan nia eskola ha’u hanoin barak,” negosiante ne’e tenik.
Tempu hanesan negosiante sambaku Nicolão da Costa Cabral informa, hetan deit rendimentu naton iha loron bot natal no tinan foun, maibe liu loron boot laiha komprador atu sosa sira nia sasan, situasaun ne’e sai difikuldade boot tamba laiha ekonomia finanseiru ba familia atu selu oan sira nia estudu.
“Tempu selebra tinan foun di’ak oituan mais liu tiha tinan foun estrada la di’ak kareta la mai, ema la’o de’it la mai sosa ami nia sasán kafé, masin-midar no sasán sembaku sira tamba ema sosa de’it iha toko boot sira, ami hetan rendimentu tempu bai-bain másimu hetan 10 dolár kuandu udan kareta la mai entaun ami la hetan liu,” dehan negosiante Nicolão.
Negosianta ne’e husu Autoridade Munisipal Baucau no Governu sentral aselera hadia estrada ba merkadu Tunau, nune’e transporte publiku tula komprador barak ba merkadu hodi sosa sira nia produtu.
Alende ne’e kria regulamentu rigorozu ba komunidade balun halo negosiu iha vila nova no vila antiga, tamba fa’an nafatin fatin rua refere sira konsidera taka dalan ba sira atu hetan rendimentu.
“Bailoron di’ak oituan kuandu udan bee nalihun estrada kareta motór la mai no negosiante dalan sira taka dalan ba ami negosiante permanente iha merkadu tamba ne’e estadu tenke kria kondisaun para sira tenke mai hotu,” nia rekomenda
Entertantu observasaun Jornalista iha merkadu Tunau nota tempu bai-bain movimentu komprador menus kompara ho tempu bazar domingu no kinta.
Ekipa Kobertura : RCLM
