RCLM Baucau (17-12-2025)—Asosiasaun Direitus Umanus no Justisa (HAK sígla Indonézia), konsidera Setór Agrikulutura báze no direitu fundamentál ba vida umana, atu konsumu ho saudavél no seguru hodi fó nutrisaun di’ak, tamba ne’e estadu no governu Timor-Leste presiza dezenvolve másimu setór agrikultura.
Vise Diretór Asosiasaun HAK Antonino Delima haktuir, antes ne’e halo ona peskiza ba Setór Agrikultór iha Munisipiu Aileu no Baucau tamba ne’e realiza dialogu ho Autoridade Lokál no entidades relevantes sira hodi rona dejafius ne’ebé komunidade agrikultór sira hasoru iha báze, bele hato’o ba governu bele solusiona no fó apoiu atu hasa’e produsaun agrikultura iha rai laran, hodi responde ba konsumidór.\
“Husi Asosiasaun HAK ita nafatin ko’alia la’os direitu asesu de’it ai-han nutritivu, saudavél no seguru maibe ita tenke dezenvolve agrikultura hanesan estadu ita hamrik metin bainhira mosu krize nasaun vizinus sira la exporta ai-han mai ita, ita iha kbi’it rasik konsumu ai-han lokál ne’ebé ita iha,” dehan Vise HAK ba Jornalista sira iha Salaun INFORDEPE vila Nova Baucau hafoin realiza dialogu munisipál ho tema”atu refleta hamutuk kondisaun real asuntu agrikultura hodi buka dalan no hatan ba dejafius sira ne’e hodi komemora loron direitus umanus ba dala-77 (1948-2025).
Xefe Suku Loilubu Postu Administrativu Vemasse Joanico da Costa hateten, suku Loilubu área potensial ba produsaun agrikula hanesan fehuk midar, fore-rai, batar no produtu lokál seluk tan maibe durante ne’e komunidade agrikultor sira hasoru laiha ekipamentus modernu hanesan trakor atu fila rai gratuita nune komunidade sira kuda barak hodi aumenta produsaun.
“Area Loilubu potensiál tebes kualker produsaun saida de’it liu-liu ba fehuk midar, batar no hare rai maran maibe atu hasa’e nia kuantidade boot primeiru tenke iha fasilidade tamba, suku Loilubu tinan sanolu liu ona laiha traktor ida husi Ministeriu Agrikultura Baucau, ita hetan apoiu husi amu Locateli agradese tebes nia traktor mai suku maibe kada uma-kain ida óras rua de’it entaun sai problema ita hasa’e produsaun,” Autoridade Suku Loilubu preokupa.
Entertantu, diálogu Munisipál hala’o iha munisipiu Baucau durante loron ida no hola parte husi autoridade suku Uma-Ana-Iku, Uma-Ana-Ulu, Defauasi, Loilubu, Sosiedade Sivil, juventude no estudante husi Institutu Katólika Formasaun Profesores (ICFP)n o Institutu Superior Krista l(ISC) polo Baucau.
Ekipa Kobertura : RCLM
