RCLM Baucau (17/12/2025)—Ministeriu Administrasaun Estatal realiza aktividade aktualizasaun baze de dadus kona ba Eleitoral, sistema integradu informasaun no jestaun dadus suku no aldeia, Balkaun Uniku, Portal Municipal, Profile municipal ne’ebe realiza iha salaun Apuramentu Munisipiu Baucau.
Kordenador ekipa baze de dadus aktual Diretur Nasional Apoio Instalasaun Munisipal iha MAE Gaspar Nuno Gusmão hateten, dadus populasaun aktualizadu no fiavel mak fator esensial ba planeamentu investimentu determina reprejentasaun iha nivel lokal no aktualizasaun baze de dadus ne’e hanesan indikador xave ba relatoriu avaliasaun kondisaun minimu.
Nia hatutan objetivu husi sorumutu nee atu asegura implementasaun efetivu ba dezentralizasaun administrativa no transformasaun dizital liu husi reajustamentu, aktualizasaun no integrasaun dadus populasaun no eleitoral iha nivel munisipal to’o iha suku sira.
“Objetivu ne’e ami ezekuta dekreitu lei 49/2023 ho ninia baze legal 34/2025 sobre ejekusaun estratejika dezentralizasaun no poder lokal atu asegura implementasaun aktividade ba prosesu dezentralizasaun no poder local, reazustamentu verifikasaun aktuizasaun demografiku no sosiu ekonomiku suku sira, inklui informasaun agregadu familiar”. Dehan Gaspar ba jornlaista RCLM Baucau quarta feira, 17/12/2025.
Entertantu Prezidente Autoridade Munisipiu Baucau Veneranda Lemos hateten, durante loron tolu Autoridade Munisipiu Baucau hamutuk ho ekipa Ministeriu Administrasaun Estatal Avalia ba kondisaun minimu Baucau nian ba Dezentralizasaun Administrativa no Poder Lokal.
“Autoridade Munisipiu desde horseik, ohin no aban ami tama ona ba avaliasaun kondisaun minimas, horseik iha intervista ho diretores sira atu fornese dadus fornese sira ninia dezafius ga potensialidade saida maka iha aprejenta hotu ba ekipa avaliador ninian, para atu hare kondisaun Baucau nian to’o iha ne’ebe”. Dehan PAM Veneranda
Nonu Governu Konstituisional liu husi Ministeriu Administrasaun Estatal kontinua implementa aktividade espesifiku hodi atinji objetivu kona ba Dezentralizasaun Administrativa no Poder Lokal bazeia ba dekreitu lei 49/2023, alterasaun ba dekreitu lei 3/2016 ne’ebe Republikadu iha Dekreitu lei 34/2025 no tuir Rejulusaun Governu numeru 6/2025, ne’ebe refere ba ezekusaun estratejia Dezentralizasaun Administrativa no Instalasaun orgaun Reprejentativo Poder Lokal 2025 to’o 2028.
Ekipa Kobertura : RCLM
