RCLM Baucau (15-12-2025)—Pre-eskolár Katólika São Francisco de Assis Bercoli iha suku Uma-Ana-Ulu Postu Administrativu Venilale Munisípiu Baucau, gradua estudante finalista tinan 2025 na’in rua nolu resin rua (22).
Diretora Pre-eskolár Katólika São Francisco de Assisi Bercoli Madre Maria Zita hateten, graduasaun estudante finalista ba da-haat ne’e nu’udar sentidu agradesementu ba sira nia dedikasaun prosesu estudu durante iha Pre-eskolár atu kontinua ba primeiru klase ensiñu báziku.
Nia esplika, prosesu estudu ba estudante Pre-eskolár hahú tinan 4 to’o lima aprende literásia, númerasia no atividade halimar, hodi muda labarik sira nia karakter servisu hamutuk no sosiál sira tuir matadalan ne’ebé profesóres sira dezenvolve.
”Graduasaun ne’e ba labarik sira ne’ebé remata ona nia estudu iha pre eskolár TK A tinan 4 no TK B tinan 5 nu’udar finalista iha pre eskolár atu kontinua ba ensiñu báziku ho nune’e nia halo graduasaun nu’udar sinál agradese ba profesores no inan-aman sira,” hateten Madre Zita hafoin remata serimónia graduasaun ba finalista Pre-eskolár São Francisco de Assisi Bercoli.
Diretór Fundasaun São José Departamentu Edukasaun Diocese Baucau , Padre Bernardo Manuel Luís da Silva hateten, edukasaun mak save muda ema nia kapasidade no sai intelekutál hodi kontribui dezenvolvimentu, tamba ne’e husu inan-aman investe oan sira nia estudu hahú Pre-eskolár to’o ensiñu superiór.
”Edukasaun sai save ba dezenvolvimentu, maske edukasaun la muda mundu maibe edukasaun eduka ema mak muda mundu, la fasil ita hanorin ita nia oan infatil sira tamba sira nia natureza ita hakarak oin seluk sira nia hakarak oin seluk, entaun ita tenke tuir sira liu husi sira nia odamatan sai husi ita nia odamatan, tanba ne’e agradese ba madre diretora eskola no profesór sira nia pasénsia, enkoraja mós ba inan aman sira tenke haruka oan sira ba eskola ita labele haksolok sira graduasaun Pre-eskolár maibé to’o nivél ensiñu superiór sira nune’e sira nia futuru kontinua la’o ba oin nafatin,” Padre Beranardo fó hanoin.
Reprezentante inan-aman graduante Pre-eskolár Katólika São Francisco de Assis Bercoli Elsa Fraga Belo agradese ba diretora eskola no profesór ne’ebé pasénsia, eduka sira nia oan durante tinan rua iha pre-eskolár atu hakat ba primeira klase ensiñu báziku.
”Ami sente orgullu ho graduasaun ne’e tamba ami nia oan sira aprende ona materia bázika ruma kontinua aprende iha primeiru síklu no kontinua akompaña sira nia estudu to’o jornada ikus nian,” dehan Reprezentante inan aman graduante.
Entertantu serimonia graduasaun ne’e partisipa husi Autoridade Postu Administrativu Venilale, Xefe suku Uma-Ana-Ulu, Uma-Ana-Iku, Madre, Katekista no inan aman.
Ekipa Kobertura : RCLM
