RCLM Baucau (06/12/2025)—Udan boot ne’ebe akontese hahu husi loron 29 fulan novembru to’o mai iha loron ida fulan dezembru tinan ne’e, afeita ba estrada ligasaun aldeia Daemena suku Abu liga ba suku Lelalai Postu Matebian Munisipiu Baucau monu no ameasa kotu.
Xefe Suku Abu Fidelio Sarmentu dos Santos hateten, estrada refere hetan reabilitasaun husi Kompaña Cuba Unipessoal Lda no hetan donator husi UNDP ne’ebe finaliza iha iha fulan juñu tinan ne’e, maibe hahu monu fila fali tamba kauza husi udan boot ne’ebe akontese foin lalais ne’e.
Xefe suku hatutan Relasiona ho akontesementu estrada monu, difikulta ba komunidade sira asesu transporte publiku hodi lori produtu lokal ba merkaduria.
“Estrada ida ne’e halai ba dala rua tiha ona uluk primeiru ne’e hanesan ohin hau hateten rai halai uluk iha 2021 depois estrada husi kompaña CUBA apoio husi UNDP halo tiha ona manutensaun no reabilitasaun, maibe realidade akontese nia halai fila fali deit tamba momentu kauza ne’e momentu sira engeneiru komapanha no UNDP diskute malu ho ami, hau nia xefe aldeia rasik hato’o sujestaun katak se bele ita boot sira ke’e naruk tan uituan to’o tiha rai ne’ebe metin toos ne’e tiha lai depois ita boot sira tau bronzon para labele halai tan sira lakohi halo tuir buat ne’ebe ami nia hakarak, to’o ohin loron rai halai ba dala rua”. Dehan Xefe Suku Abu Ba jornalista Iha nia rezidensia Vila nova Baucau, quarta, 03/12/2025
Xefe suku Fidelio husu ba kompetente sira tau atensaun masimu atu normaliza fila fali estrada refere, hodi bele faselita komunidade sira asesu transporte publiku.
“Nudar Lideransa Autoridade Suku rekomenda ba Autoridade Munisipiu atu nunee bele tau importansia ba estrada refere liu husi atendimentu emergensia, atu nune bele faselita fila fali komunidade sira suku hat ne’e tamba kuandu estrada ne’e kotu sira labele hakat liu ona iha kedas aldeia Daemena iha hau nia hela fatin hodi fo impaktu ba suku refere tamba ne’e husu ba Autoridade Munisipiu bele tau importansia atu nunee bele asegura lalais estrada ne’e hodi komunidade sira bele asesu lori sira produtu lokal ba merkadu” Xefe Suku Fidelio hato’o rekomendasaun.
Estrada refere fo asesu ba Suku hat hanesan suku Abu, suku Laisorulai aldeia Sawakasa, Suku Lelalai no Suku Waibobo enkuantu estrada refere dadaun ne’e hela metru rua, no monu ou halai kuaze to’o metru sanolu resin, ho preokupasaun ne’e Autoridade Suku relata ona ba parte Autoridade Munisipiu Baucau hodi halo intervensaun.
EKipa Kobertura RCLM
