RCLM Baucau (28-11-2025)—Governo liu husi Ministériu Edukasaun, kompremitidu kontinua asume responsabilidade hodi hasa’e kualidade Edukasaun nivél Nasionál iha Timor-Leste.
Komprimisiu ne’e Ministra Edukasaun Dulce de Jesus Soares hateten ba Jornalista sira hafoin remata prezide içar Bandeira Repúblika Demokrátika Timor-Leste (RDTL), iha aniversáriu Proklamasaun Independénsia Unilaterál ba dala-50 (28-11-1975/28-11-2025) iha resintu Administrasaun Munisípál Baucau sesta ne’e.
Membru nonu governu konstitusionál ne’e hateten, Ministeriu Edukasaun asume responsabilidade boot hodi hadi’a infrastrutura eskola, halo rekrutamentu no kapasita profesores, alende ne’e halo revizaun ba kuríkulu ensiñu aprendisazem, maibe estudante no profesores tenke hatoman ba dijitalizasaun.
”Atu garante katak ita iha kuríkulu agora iha ensiñu báziku terseiru síklu atu responde ba síklu 21 nian ne’ebé estudante sira tenke hatene, parte ida importante mak estudante profesores tenke hatoma sira nia an iha dijitalizasaun ne’e parte importante boot ida, ita komesa hakat nei-neik maibe bei-beik ho ida ne’e Ministériu Edukasaun nia servisu importante atu bele prepara estudante sira infrenta ka hasoru sira nia futuru la’o ho oinsá, maibe ita nia responsabilidade prepara sira prontu hatan sira nia futuru no prontu involve prosesu dezenvolvimentu agora,” dehan Dulce.
Ministra Edukasaun rejista sala aula liu 1.550 iha territóriu Nasionál infrastrutura bázika atu utiliza ba prosesu aprendisazem no rekoñese kondisaun sei aat, maibé husi númeru ne’e komesa tinan 2023 to’o 2025 ne’e hadi’a ona sala aula 500, restu kontinua trasa ba planu orsamentu tinan 2026 hodi hadi’a.
”Ho orsamentu 2026 ita kompleta 1,000 itál salas aulas, entaun tinan rua ho balun ita garante katak 1550 salas aulas kompleta hotu no krik bele liu tan,” dehan Ministra Edukasaun.
Iha ámbitu Komemorasaun Proklamasaun Indepedensia Unilaterál iha Munisípiu Baucau Ministra Edukasaun distribui mos kadeira no meza ba Diretór eskola sia (9) hanesan EBC Uailili, EBC Gari-Uai, EBC Tirilolo, EBC Vila Nova, EBF Maucale, EBF Caibada Macasa’e, EBF Zona Golgota, ESG 01 Baucau no ESTV Vila Nova Baucau, maibe futuru kada tinan Ministériu Edukasaun sei preve nafatin orsamentu ba fasilidade mobiliariu no livru hodi apoia ba eskola sira ne’ebé laiha maibé seidauk hetan apoiu.
Entertantu dadaun ne’e Ministeriu Edukasaun rejista estudante porvolta rihun atus tolu husi Pre-eskolár to’o ensiñu sekundaria no tékniku vokasionál, profesores rihun sanulu resin neen (1016) no funsionáriu rejime jerál rihun ida (1.000).
Ekipa kobertura : RCLM
