RCLM Baucau (14-10-2025)—Komandante rejiaun I sub xefe Estadu Maior FALINITIL Lere Anan Timur asina plaka rezistensia no atribui sertifikadu rekoiñesementu lutador estafeta, resposavel kaixa no sub kaixa Luar Sentru Kaixa esperansa F.02 Viqueque, husi organizasaun rezistensia Sagrada Familia (ORSF) iha Asalatula Ossu, no husu Veteranus sira husi Frente Armada no Frente Klandestina atu kontinua unidade.
Eis Xefe Estadu Maior Jeneral Forsa Armada Tenente Jeneral Lere Anan Timur apresia inisitiva Frente Klandestina Luar Sentru Kaixa esperansa F.02 Viqueque, tamba halibur maluk klandestina iha teritoriu nasional no fo rekoiñesementu liu husi sertifikadu no hari’i mos plaka ne’ebe reprezenta teritoriu Nasional.
Eis Gerileiru ne’e apela, kombatente sira atu kontinua konsolida forsa hamutuk tamba lahamutuk bele deskofia malu no fo oportunidade ema seluk aproveita situasaun.
“Organiza eventu ida ne’e sira( Luar Sentru Kaixa esperansa F.02 Viqueque husi organizasaun rezistensia Sagrada Familia) nia esforsu rasik di’ak, tamba saida? sira la izola malu periodika sira la izola malu pelumenus sira periodikamente hasoru malu responsavél organizasaun fó rekoiñesementu, tamba ohin loron ita konta osan mais la konta istória, sertfikadu sira ohin fó liu osan, tamba osan ita simu ohin bele han hotu mais sertfikadu ne’e ita rai jerasaun ba jerasaun ida ne’e mak importante liu, hau fó mensagem preokupasaun ba veteranus sira tantu frente armada no frente klandestina, ita la besik malu kleur dodok malu kleur dalaruma ita deskonfia malu, ohin loron ema aproveita situasaun,” dehan Lere Anan Timur.
Prezidente Ezekutivu organizasaun rezistensia Sagrada Familia Manuel Ximenes “Besi Krekas” hateten, responsavel kaixa husi organizasaun rezistensia Sagrada Familia ne’ebe liga ba frente armada husi rejiuan 1 to’o 4 hakerek ida-idak nia istoria, no tenke unidade nafatin hanesan iha tempu luta ba ukun rasik an.
“Resposavel hotu ne’ebé liga ba Frente Armada tantu rejiaun 1, 2, 3 no 4 tenke prepara nia historiku para sai nia historiku ba ita ida-idak uluk servisu ne’ebé hau nia apelu grupu hotu-hotu moris tempu rezisténsia tenke esforsu an ita hamutuk nafatin servisu hamutuk unidade, husu ba responsavél Kaixa hotu hotu hanoin hamutuk sai hanesan unidade asaun progresu para kontinua nafatin, tamba agora dadauk ita nia sofrementu lavale buat ida,” hateten Prezidente ezekutivu ORSF.
Kordenador Maximu Luar Sentru Kaixa esperansa F.02 Viqueque Felisberto Monteiro Guteres “Oan Kiak” hateten, inisiativa atribui sertifikadu ba resposavel kaixa no sub kaixa Luar Sentru Kaixa esperansa F.02 Viqueque no hari’i plaka rezistensia nu’udar valor rekoñesementu no simbolu servisu estafeta iha tempu rezistensia, nune’e sai memoria ba jerasaun foun sira.
“Sertfikadu ne’e rekoiñesementu husi hau depois to’o estadu Timor-Leste ba to’o CCLN, no sertfikadu ne’e ami halo modelu oin seluk naran oin (identidade) iha kotuk sira nia partisipasaun funu no importante ba sira nia oan nia jerasaun sira, plaka ne’e nu’udar simbolu via estafeta ne’ebé mak ami liga iha estafeta 18,” esplika Kordenador masimu Luar Sentru Kaixa esperansa F.02 Viqueque.
Entertantu sub kaixa ne’ebe mahon husi Luar Sentru Kaixa esperansa F.02 Viqueque hamutuk 43 no membru husi teritoriu Timor-Leste hamutuk rihun tolu atus neen sia nolu resin neen.
Ekipa Kobertura : RCLM
