RCLM Baucau (22/06/2025)—Ministeriu Saude servisu hamutuk ho Ministeriu Edukasaun, realiza programa kuidadu saude primaria, iha ne’ebe identifika estudantes hamutuk rihun ida atus lima resin malnutrisaun, ne’ebe kompostu husi eskola Ensinu baziku 29 iha Munisipiu Baucau.
Xefe Departementu ofisial programa Edukasaun promosaun saude Abrão Pinto hateten, objetivo programa pakote kuidadu saude primaria ne’e, atu hare estudantes sira nia estatus nutrisaun, inklui halo eskrening ba estudate sira nia Tilun, nehan no matan inklui nia todan.
Abrão hatutan, rekomenda ba Ministeriu Edukasaun, atu hadia menu merenda eskolar tamba dadaun ne’e, halo ona identifikasaun estudante barak mak malnutriasaun.
“Pezu menus ho ida grave 603 husi 6100 agora sira ne’ebe pezu menus tamba iha menus grave ne’e tama ona ba Malnutrisaun hamutuk 933 entaun ho numeru ne’ebe boot 1536 ne’e tama iha moderadu ho malnutrisaun tamba liga ona ba merenda esoolar ne’ebe mak iha ami agora prepara hela para iha enkontru segunda mai ami sei kolia direita ba inspektur eskola no mos diretur edukasaun para ita bele hare tok kona ba menu merenda eskolar ne’ebe implema dadaun ne’e”. Dehan Abrão Pinto iha nia kna’ar fatin Sesta Feira (20/06/2025).
Entertantu kordenador ensinu baziku filial katoliku São Domingos Savio Feliciano dos Santos hateten, sente kontente no agradese ba Ministeriu Saude, tamba bele halo identifikasaun ba estudantes sira ne’ebe infrienta moras malnutrisaun,matan, tilun no nehan, atu nunee fasil tuir prosesu aprendisagen ho diak.
“Doutor no doutora sira ne’ebe mai iha ne’e atu nunee bele faselita labarik sira nia saude, tinan kotu kotuk ne’e la iha maibe tinan ida ne’e maka foin iha maibe ba pakote kona ba saude primaria iha eskola ida ne’e, liu liu ajuda labarik sira nia tilun, nehan no matan, ne’ebe hau hanoin katak ida ne’e faselita diak labarik sira atu nune’e labarik sira bele hatene diak liu husi professores sira”. Haktuir Kordenador eskola
Total estudante ne’ebe tuir kuidadu saude primaria hamutuk rihun 31 resin, kompostu husi eskola ensinu baziku hamutuk 185, enkuantu estudante ne’ebe mak tuir ona kuidadu saude Primaria hamutuk rihun hitu resin kompostu husi eskola 29 iha Munisipiu Baucau.
Ekipa Kobertura : RCLM Baucau
