RCLM-Baucau (30/07/2026)—Klibur Sobrevivente Feto “Pirilampu” tinan 1974–1999 iha Munisípiu Baucau, hamutuk ho Asia Justice And Rights (AJAR), Asosiasaun Chega! Ba Ita (ACbit), Asosiasaun Unidade Feto bá Dezenvolvimentu (AUFD) no akompaña husi Autoridade Munisipál Baucau, realiza lansamentu livru “Lalatak no Roman Pirilampu, Memória Sobrevivente Pasadu”.
Livru refere rekolal no hakerek istória moruk husi sobrevivente feto no labarik sira, ne’ebé hasoru konflitu pasadu tinan 1974–1999, ho objetivu atu rai memória no fó sai referénsia ba jerasaun foun.
Dirijente Klibur Sobrevivente Feto “Pirilampu” Munisípiu Baucau, Maria Juliana Boavida, hateten livru ne’e rezultadu husi serbisu hamutuk entre parseiru lokal no internasionál, inklui Asosiasaun Unidade Feto ba Dezenvolvimentu (AUFD), Asosiasaun Chega! Ba Ita (ACbit), Asia Justice and Rights (AJAR), ho apoiu husi Global Survivors Fund (GSF) no Centru Nasionál Chega (CNC).
Nia husu ba instituisaun kompetente atu kontinua tau matan no rona preokupasaun husi klibur sobrevivente feto no labarik sira.
“Desde tinan lubuk ACBIT, AJAR ho parseiru sira hala’o serbisu dezenvolve no hare ami sobrevivente ida-idak nia istória, no husu ba nai ulun no parseiru tau matan no rona mos ami nia lian,” dehan Dirijente Klibur Sobrevivente Feto”Pirilampu” Munisipiu Baucau iha salaun “Soi-Mali” Vila Nova Kinta ne’e.
Membru Komite Diretiva Programa Bukae husi ACBIT, Adelia Maria Guterres, apresia ba inan-aman sobrevivente sira iha Munisípiu Baucau, tamba sira prontu fahe istória moruk ne’ebé sira hasoru durante konflitu pasadu.
Adelia esplika, livru ne’e sai hanesan meiu advokasia atu hatudu kontribuisaun feto sivíl sira iha luta ba ukun-an Timor-Leste, ne’ebé dala barak la hetan rekoñesimentu.
“Livru ne’e sai hanesan advokasia ba ema seluk hatene katak ukun an ne’e la’os uza de’it ho kilat no veteranu ne’ebé hasoru inimigu, maibe feto sira sivil laiha ema ida koiñese sira rasik kontribui ba ukun rasik an hodi fo sira nia an liuhosi violasaun seksuál,” esplika Adelia.
Prezidente Autoridade Munisipál Baucau, Veneranda Eurico Lemos Martins, konsidera livru “Lalatak no Roman Pirilampu” hanesan dokumentu importante atu ajuda jerasaun foun bele hatene kona-ba sofrimentu no esperiénsia husi sobrevivente sira, durante luta ba independénsia.
Nia akresenta, lansamentu livru ne’e la’os de’it serimónia simbóliku, maibé oportunidade atu aprende no komprende memória husi inan, avo no tia sobrevivente sira, ne’ebé durante ne’e hela iha silénsio ho sira nia terus.
“Lansamentu livru lalatak no naroman pirilampu la’os lansa ne’e de’it no poletania ba pájina maibe livru ida ita tenke hatene memoria saida mak iha livru laran ho ema ida-idak konta nia istória ne’ebé lahanesan husi ita nia inan, avo no tia sira sobrevivente ne’ebe ema barak lahatene, maibe sira nonok ho sira nia terus, entaun husu mos ba estudante sira atu hatene lolos istoria ne’ebé ema ladun konta,” dehan PAM.
Lansamentu ne’e partisipa husi Autoridade Munisipál Baucau, reprezentante Konsellu Munisipál Kombatente Libertasaun Nasionál Baucau, Segundu Komandante PNTL Munisípiu Baucau, Administradora Vemasse, xefe suku, no inan-aman sobrevivente sira husi Postu Administrativu Baucau Vila, Quelicai, Matebian no Vemasse.
Ekipa Kobertura: RCLM
