RCLM-Baucau (28/07/2026)—Autoridade Munisipal Baucau tersa ne’e, realiza reuniaun Konsellu Kordenasaun Munisipal no aprezenta ordem traballu neen, hodi halo diskusaun no fo apesiasaun inklui parser, nune’e iha futuru hadia serbisu sira hodi fo benifisiu ba komunidade no kontribui ba prosesu dezenvolvmentu.
Sekretariu Munisipal Baucau, Asuntu Administrasaun Finansas Juvinal Daniel Filpe Belo esplika, reuniaun konsellu kordenasaun munsipal realiza kada fulan ho intensaun membru konsellu kordenasaun sira bele rona direta aprezentasaun ordem traballu sira hodi halo diskusaun, apresiasaun no parser hodi mellora serbisu tuir progama ne’ebe planeadu kada fulan.
“Sorumutu ohin loron nian orgaun konsellu kordenasaun munisipal ne’ebé kada fulan sempre halo, ohin loron ba fulan ida ne’e nian (Jullu) no nia funsionamentu kordenasaun la’o regras ne’ebé vigor,” dehan Juvinal iha salaun Administrasaun Munisipal “Soi-Mali” vila nova tersa ne’e.
Reprezentante Prezidente Konsellu kordenasaun Munisipal Baucau esplika, ordem traballu aprezenta iha reuniaun konsellu kordenasaun munisipal ne’e mak hanesan, aprezentasaun kona-ba investimentu ba dezenvolvimentu lokal no kapital humanu, inklui alokasaun orsamentu PDIM-PNDS 2024-2026, implementasaun programa merenda eskolar, aprezentasaun progresu ejekuasaun atividade uzu de solu, aprezentasaun estatutu rai no propritariu lista arendamentu estadu, kuartu prestasaun serbisu HOREX Baucau, kintu divulgasaun manual identidade no monografiku, hodi uniformiza dokumentus ofisial administrasaun lokal iha Timor-Leste no sextu divulgasaun diploma ministerial numeru 31/2026 3 de jullu, kona ba rekoiñesementu Suku no Aldeia iha Munisipiu Baucau.
“Kordenasan ne’e intensaun halo pareser no apresiasaun ba asuntu sira ne’ebe diskute kada fular regular halo no ita nia espetativa informasaun sira aprova ordem traballu ne’e bele hatutan ba autoridade lokál sira no komunidade sira mantein orientasaun sira,” akresenta Sekretariu Munisipal administrasaun no Finansas.
Xefe suku Soba Francisca Mónica de Fátima Soares apresia reuniaun KKM, tanba fo biban ba autoridade lokál sira avalia programa sira Autoridade Munisipal implementa no fo pareser lakunas sira hodi hadia iha futuru.
“Reuniaun KKM ne’e ami fo apresiasaun no rekomedasaun sira para hadia serbisu iha future, husi suku Soba rekomenda ba parte Terras no Proriedades tanba sukat rai hahu 2024, maibe to’o agora ninia kontinuasaun laiha,” hateten Xefe suku Soba.
Enkuantu, membru KKM hola parte iha sorumutu ne’e hamutuk 79 kompostu husi estrutura Autoridade Munisipal, Diretores Serbisu Munisipal no delegasaun territorial, Administrador Postu Administrativu ualu, inklui reprezentante xefe suku kada Postu ema na’in-2.
Ekipa Kobertura : RCLM
