RCLM Baucau (27/07/2026)—Unidade Prevensaun Konflitu Komunitariu (UPKK) iha munisipiu Baucau infrenta difikuldade menus reskursu umanus atu destaka iha Postu Administrativu 8 no fasilidade serbisu hanesan komputador no printer.
Xefe Deparamentu UPKK Munisipiu Baucau, Fransisco Boavida da Costa hateten, Unidade Prevensaun Konflitu Komunitariu (UPKK) iha Munisipiu Baucau ho vizaun atu garante sidadaun hotu moris paz no estabilidade iha harmonia social, no iha konsiensia prevensaun konflitu atu kontribui ba dezenvolvimentu nasionál, maibe durante estabelese iha Munisipiu Baucau infrenta difikuldades rekursu limitadu atu destaka kompleta ba Postu Administrativu foun Quelicai Antigu no Matebian.
Alende ne’e postu tuan ne’ebe existe hanesan Baucau vila, Laga, Quelicai no Vemasse seidauk destaka kompelta rekursu kompostu kordenador, pontu fokal no mediador.
Nia haktuir, Nonu Governu iha tinan 2023 Ministeriu Interior konsege rekruta pontu fokal, mediador inklui kordenandor mai apoiu diresaun unidade prevensaun konflitu komunitariu Munisipiu Baucau hamutuk 23 hodi destaka postu, maibe dadaun ne’e na’in-3 muda ba nasionál kontinua sira nia estudu nune’e rekursu tinan ne’e menus.
“Iha postu foun rua (Quelicai Antigo, Matebian) inklui postu tuan Quelicai ita laiha rekursu agora pesoal ida mak kobre postu tolu ne’e, depois postu Baucau vila, Laga Vemasse ema na’in rua de’it lolos tarjeitu ema na’in tolu destaka ba postu ida kompostu kordenador, pontu fokal no mediador maibe foin kordenador de’it falta mediador no pontu fokal,” hateten Xefe Deparamentu UPKK iha nia kna’ar fatin vila nova.
Fransisco afirma, difikuldade seluk infrenta mak menus fasilidade Administrasaun hanesan komputador no printer, inklui motorizada ba rekursu sira ne’ebe destaka ona atu apoiu sira nia serbisu iha terenu.
“Ami halo gestaun no halo proposta eskrita hato’o ba nasionál maibe ate data laiha resposta ruma tanba ne’e ami mantein ami nia proposta, rekomenda nafatin ba diresaun nasionál atu kompleta rekursu sira inklui mos fasilidade informatika no transporte ba postu ualu ne’ebé seidauk hetan kada kordenador atu utiliza,” Xefe Deparamentu UPKK Munisipiu Baucau rekomenda.
Enkuantu dejafius seluk mak laiha kombustivel ba Xefe Deparamentu no funsionariu sira atu ense ba motor, hodi tun ba terenu halo serbisu mediasaun konflitu.
Bazéia planu no proposta husi Unidade Prevensaun Konflitu Komunitariu Munisípiu Baucau ba Governu sentrál liuhosi Ministériu Interiór presiza rekruta reskursu umanus hamutuk 12, hodi destaka ba postu sira ne’ebé seidauk kompleta, alende ne’e apoiu motorizada ualu no komputadór, printer unidade ualu ba Postu Administrativu sira.
Ekipa Kobertura: RCLM
