RCLM Baucau—Konsellu suku Caibada no suku Tirilolo hamutuk ho lia-nain halo serimonia ritual hodi husu lisensa ba natureza molok kompañia konstrutor halo reabilitasaun estrada husi Caisido to’o rotunda vila antiga suku Bahú Postu Administrativu Baucau vila.
Xefe suku Caibada Cosme da Costa Lopes hateten, intensaun husu lisensa ka autorizasaun ba natureza atu asegura prosesu implementasaun projeitu Estrada ekipamentus no traballadores sira labele akontese dezastre.
”Antes ita hlo serbisu ruma(reabilitasaun estrada)primeiru ita husu autorizasaun ba ita nia natureza kultura tanba ita moris ho kultura,entaun prepasaun halo estrada kontinuasaun caisido suku Tirilolo nian ba Caibada, Bahú no parte vila laran,” hateten xefe suku Caibada iha fatin rituál Cailobu-bai Caisido.
Reprezentante lian-nain, Feliciano Belo afirma, serimonia ritual ne’e la’os foin implementa maibe desde beila sira nia tempu to’o ohin loron sira kontinua nune’e projeitu estrada la’o ho susesu tuir data kontratau ne’ebé determina.
“Labele akontese buat ruma ami iha ne’e sempre halo serimonia ritual kle’ur ona la’os foin agora buat boot no kiik sempre liu hui kultura tanba halo estrada ne’e ba ita jerál ne’e mak husu lisensa tiha foin halo, labele liu de’it,” hateten reprezentante lian nain.
Komunidade suku Caibada, Raul António Boavida agradese ba governu, tanba responde sira nia preokupasaun atu hadi’a estrada ne’ebé durante tinan barak kondisaun aat.
“Ita espera ho serimonia kultural ne’e la’o pelemenus implementasaun la’o povu hotu-hotu bele asesu dalan ida ne’e no komunidade pronto kontribui, tamba halo dezenvolvimentu,” dehan komunidade Caibada.
Entretantu, Governu liuhosi Ministeriu Planeamentu Investimentu Estratéjiku (MPIE) asina ona kontratu ho kompania implementador Jova Konstruktion Limitada no Planaltu Star hodi implmenta projeitu pakote rua hamutuk kiolomentru 11, pakote primeiru husi Casido ba area Laho suku Triloca ho distansia kilometru 3 no pakote segundu husi casido suku Tirilolo,Caibada (Wai-Mua) to’o rotunda vila antiga suku Tirilolo, Projeitu ne’e ho dursaun serbisu tinan ida no orsameentu ne’ebé governu preve hamutuk milliaun 6 resin.
Ekipa Kobertura : RCLM
