RCLM Baucau (02/06/2026)—Autoridade Munisipiu hamutuk ho fundasaun Uma Pas Baucau, inklui komunidade Suku Abafala komemora loron nasional ba labarik, ne’ebé realiza iha Eskola ensinu baziku filial Alin Laek Mumana Postu Administrative Quelikai Munisipiu Baucau, ho tema “proteje ami nia direiitu, garante Inkluzaun no hari’i futuru ne’ebe diak” ho objetivu atu promove direitu no protesaun labarik hametin papel familia no komuniddade, inklui kria ambiente seguru no favoravel ba dezenvolvimentu labarik sira.
Reprejentante prezidente Autoridade Munisipiu Baucau Maria Celestina Viegas hateten, husu ba estudante sira esforsu an estuda makas, atu sai jerasaun ida ne’ebe nabilan, hodi kontinua eroi no eroina sira nia mehi hodi luta ba dezenvolvimentu nasional iha futuru.
“Atu sira ne’ebe atu matenek presija eskola, loron sempre ba eskola hare malu diak bele hanoin atu enveja malu, ita boot sira oan doben sira nia papel mak estuda, estuda, no estuda nafatin , husi estuda sai jerasaun ne’ebe nabilan iha futuru, atu kontinua nafatin mehi sira ne’ebe ita nia saudozu/a sira ne’ebe mehi hodi dezenvolve rai ida ne’e”. Dehan Reprejentante Prezidente Autoridade Munisipiu Baucau iha nia diskursu iha Aldeia Mumana Segunda, 01/06/2026
Diretora Uma Pas Baucau Felismina Belo konsidera, selebrasaun loron nasional ba labarik ne’e importante tebes, tamba oinsa atu motiva labarik sira hodi sai lideransa ne’ebe diak iha futuru oin mai.
“Selebrasaun ne’e hanesan motivasaun ida ba labarik sira, ohin ita boot sira hare kata sira nia aprejentasaun sira fiar an los sira hakarak asumi kargu, entaun ida ne’e hanesan fo mehi brillante ba labarik sira atu nune’e sira atu dedika an ba futuru sai lider ida ne’ebe responsablidade ita nia oan sira tenke prepara ba futuru lider ida, labele hanoin katak kargu deit mais tenke resposablide atu bele tau matan ga tulun povo no rai doben ida ne’e”. Hatete Felismina
Entertantu estudante Alin Laek Mumana Juvencia Dos Reis Belo hateten, sente kontente tebes, tamba durante oras tolu nia laran sai hanesan Prezidente Autoridade Munisipiu Baucau, ida ne’e hanesan motivasaun hodi prepara aan ba iha futuru.
“sente kontente no orgullu tamba sai lideransa ke no hau asimu kargu hanesan Prezidente Autoridade Munisipiu no sei motiva hau hakarak estuda ba hau nia futuru sai Prezidente Autoridade Munisipiu” haktuir estudante
Aktividades ne’ebe mak hala’o iha selebrasaun loron Nasional ba labarik mak hanesan, estudante husi eskola ensinu baziku filial Alin Laek Mumana nain hitu durante orsan tolu sai hanesan Prezidente Autoridade Munisipiu Baucau, Administrador Postu Administrativu, Komandante PNTL eskuadra, Xefe Suku no seluk tan.
Ekipa kobertura : RCLM
