RCLM Baucau (20/05/20226)—Prezidente Autoridade Munisipal Baucau Veneranda Eurico Lemos Martins kompromete esforsu buka dalan, hodi hadia kampu futebol Caisido suku Tirilolo Postu Administrativu Baucau vila no Kampu Uai-Aca Mulia.
Lideransa Munisipal Baucau hato’o komprimisiu ne’e bainhira ensera jogu komunitariu ne’ebé konsellu suku Tirilolo realiza iha kampu Caisido durante semana tolu, maibe laiha problema no kontribui tebes ba paz no unidade.
Eis Deputada ne’e avalia, área Caisido no Mulia joven potensiál ba desportu, maibe kampu kondisaun aat tamba ne’e buka dalan hato’o ba Governo sentral, liu-liu ministeriu juventude desportu arte no kultura no emprezariu Baucau oan fó apoia hodi kria fasilidade naton ba joven sira iha área rua referida.
“Área ida ne’e (Caisido) potensiál tebe-tebes ba desportu pemain di’ak feto no mane, tamba hatudu atetude ne’ebé di’ak kontribui ba páz no dezenvolvimentu tamba ne’e hau hateten ba xefe suku parese kampu ne’e ita bele hadi’a,” dehan PAM Baucau iha Kampu Caisido.
PAM Baucau informa, atu hadia kampu komunidade sira labele impede rai ka halo disputa, nune’e tekniku sira halo levantamentu dadus hodi submete ba Ministeriu Juventude Desportu Arte no Kultura, hodi trasa ba planu reabilitasaun no apoiu husi emprezariu sira.
“Importante mak labele problema ba rai, bainhira iha problema ba rai no laiha impedimentu, hau sei esforsu an tomak hanesan mos hau promete iha komunidade Uai-aca iha kampu futebol ida ne’eba, hau buka dalan atu hadi’a, entaun hau iha tusan rua,” tenik PAM Baucau.
Enkuantu observansaun Radio Komunidade Lian Matebean iha terenu nota, kampu futebol Caisido no Uai-Aca Mulia bainhira hala’o jogu iha laran tempu udan hamosu taho, no tempu bailoron hamosu rai rahun, alende ne’e laiha rede protesaun animál sira livre tama iha kampu bainhira laiha jogu.
Ekipa Kobertura : RCLM
