RCLM Baucau (19/05/2026)—Sarani katolika ne’ebé di’ak presiza silensiu bainhira tama igreija, hodi partisipa misa la’os konversa ne’ebé la nesesariu hodi interompe maluk sira nia konsentrasaun, tamba igreija nu’udar fatin orasaun no tenke respeita sakrariu iha altar sagradu, inklui imajem Na’i Maromak nian.
Lia hirak ne’e hato’o husi Autoridade Munisipiu Baucau Veneranda Lemos Martins, bainhira remata misa agradesementu selebrasaun loron 20 maiu Restaurasaun Indepedensia ba dala-24 iha igreja Katedral vila antiga Baucau tersa ne’e.
Prezidente Autoridade Baucau hateten, sarani balun partisipa misa ko’alia konsidera larespeita maluk sira seluk ne’ebé silensiu hodi hato’o devosaun ba Maromak, tamba ne’e husu sarani sira atu partisipa misa presiza silensiu hodi halo komunikasaun ho Na’i Maromak.
“Iha li’ur ita iha istória barak bele ko’alia, maibe kuandu ita tama igreja laran silensiu netik oituan la’os óras barak másimu óras ida, maibe ita lahalo ida ne’e, ita tama mai igreja ida-idak ko’alia hanesan tempu seluk ba ita laiha, respeita ema seluk iha igreja atu halo orasaun no komunikasaun ho Na’i Maromak,” Autoridade Baucau fó hanoin.
Iha fatin hanesan, Diretor Kaza Saleziana Postu Administrativu Baucau Vila Padre Áderito Victor da Costa avalia, sarani sira partisipa misa sei ko’alia tamba konsidera laprepara Espiritual ho konsentrasaun nune’e mos distinsaun entre uma orasaun ho fatin publiku.
“Joven no estudante halo hanesan ne’e (ko’alia iha igreija), tamba ne’e dalabarak ita fó hanoin nafatin no hau agradese ba PAM fo idea ida ne’e espresa ba ita hotu nia laran ho sentidu ispirituál ba orasaun no silensiu,” afirma Diretor Kaza Saleziana Baucau vila.
Enkuantu Padre Aderito mos fo hanoin sarani sira atu partisipa misa ko’alia ho Maromak presiza silensiu ne’ebé kle’an, tamba uma kreda fatin sagradu.
Ekipa Kobertura : RCLM
