RCLM Baucau (26/05/2026)—Servisu Munisipal Agrikultura Pekuaria Peskas no Floresta Baucau liu husi departamentu mekanizasaun, infrenta problema kombustivel atu fila natar gratuita husi komunidade agrikultor.
Resposavel Mekanizasaun Manuel da Costa Guzmão hateten, kombustivel tinan 2026 husi fulan janeiru to’o agora Ministeriu Agrikultura Pekuaria Peskas no Floresta seidauk apoia ba Servisu Munisipal Agrikultura parte mekanizasaun, atuál uza kombustivel restu tinan 2025 maibe stok sei hotu semana ne’e.
Nia afirma, epoka primeiru tinan ne’e foin atende proposta agrikultor husi Postu Administrativu Venilale no Baucau vila, hodi fila natar gratuita enkuantu Postu Administrativu seluk seidauk.
“Mina ami hein tenderizaun tinan 2026 to’o agora seidauk iha, ami uza tinan kotuk 2025 nian dua ton ami uza restu sei iha, maibe semana ne’e hotu ona ami labele halo buat ida ona” hateten Manuel iha nia kna’ar fatin Servisu Munisipal Agrikultura Vila Nova Baucau tersa ne’e.
Nia informa, alende ne’e hasoru difikuldade laiha ekipamentus manutensaun traktor, tamba prosesu sosa ekipamentus foun manutensaun liu husi prosesu tenderizaun no sei sentraliza iha Nasionál.
“Parte mekanika nian biokruzeta ami husu iha janeiru maibe dehan liu husi tender to’o agora seidauk iha, krugeta ka pezadu nia osan manutensaun kiik liu trimestre ida $ 250, ami baku ba traktor ida dolar 2 resin hola kastol ida latoo, tamba ne’e makina barak avaria” responsavel Mekanizasaun Servisu Munisipal Agrikultura Peskas no Pekuaria Baucau preokupa.
Responsavel Mekanizasaun husu Ministeriu Agrikultura Pekuaria Peskas no Floresta atu responde preokupasaun hanesan fornese kombustivel no ekipamentus manutensaun traktor nian, nune’e tratorista sira bele halo servisu atende proposta agrikultor husi Postu nune’e fila natar.
Enkuantu iha epoka primeiru tinan ne’e, parte mekanizasaun foin fila natar hekatres 332 iha Postu Baucau vila no Venilale. Totál traktor boot iha servisu Munisipal Agrikultura Baucau hamutuk 34 kondisaun di’ak 9, aat kman 5 no restu aat total. Enkuantu rekursu tratorista hamutuk 16 maibe nain 2 moras permanente no 14 mak ativu.
Ekipa Kobertura : RCLM
