RCLM Baucau (25/05/2026)—Kondisaun estrada ba suku Lelalai kondisaun a’at grave, tamba hamosu taho dodok no ameasa kotu, iha áre Daemena suku Abo Postu Administrativu Matebian, tamba kauza husi udan boot akontese foin lalais ne’e.
Abitante Suku Lelalai Januario Freitas preokupa estrada ba sira nia suku liu-liu tempu udan, tamba nakfilak ba taho no amesa kotu iha Daemena kauza husi udan, situasaun ne’e difikulta sira ho transporte publiku no privadu atu asesu merkadu no fasilidade publiku iha Postu no Munisipiu, tamba ne’e husu Ministeriu relevante atu toma atensaun ba sira nia preokupasaun.
“Ami kuandu tempu udan estrada difikulta tebes ami nia movimentu, tamba kondisaun la permite atu asesu transporte tamba dalan ladi’ak taho dodok,” dehan komunidade Lelalai.
Sorin seluk abitante Afonso Pinto haktuir, akontesementu udan bo’ot fulan marsu to’o loron 21 maiu, rezulta estrada iha area Daemena ameasa kotu, tamba kauza husi erozaun hodi afeta mos ba nia uma.
“Dalan ne’e kareta liu ladi’ak, tamba kotu bus sira para iha ne’e (Daemena) komunidade sira tun lalin sasan ba uma, karik mate ruma lalin deit tamba liu ladiak,” tenik Afonso.
Xefe Suku Lelalai Salomão Fraga Fernandes observa, estrada ba sira nia Suku difikulta tebes movimentu komunidade, tamba estrada ne’ebé kotu iha area Daemena, tamba ne’e parte Autoridade Suku hato’o ona pedidu ba Ministeriu relevante maibe laiha resposta.
Tamba ne’e inisiativa Autoridade suku Abo no Lelalai hamutuk ho komunidade provizoria kuda au-betu no ai seluk tan, hodi satan estrada labele monu maibe lagarante atu metin.
“Ami preokupa tebes no sente triste mezmu nune’e ami hato’o ona pedidu, atu hadia no liu husi reuniaun sira ami hato’o maibe to’o agora atendementu laiha,” Xefe Suku Lelalai preokupa.
Liga ho preokupasaun ne’e RCLM tenta atu konfirma Diretor Serbisu Munisipal Obras Publika Baucau, maibe lakonsege tamba okupadu ho servisu.
Enkuantu estrada ameasa kotu iha Daemena fó asesu komunidade suku Abo, Lelalai no suku vizinus Uaibobo Postu Osso Munisipiu Viqueque.
Ekipa Kobertura : RCLM
