RCLM Baucau (20/05/2026)—Jogu Komunitariu suku Tirilolo Postu Administrativu Baucau vila Munisipiu Baucau, modalidade futebol klub, Kota Laran sai kampiaun hafoin manan futebol klub Kliwander ho skor mihis 1-0, iha jogu final ne’ebé realiza iha kampu Caisido.
Reprezentante Jogador ekipa FC Kota Laran Adelino Afonso Belo sente orgullu tamba, ekipa hetan primeiru lugar jogu komunitariu Suku Tirilolo no kompromete ho ekipa kontinua halo prepasaun másimu hodi kompete jogu komunitariu iha futuru hasoru adeversáriu.
“Ami ekipa sente orgullu hetan primeiru lugar maske iha jogu iklima udan ami ladun halo preparasaun másimu, maibe ami esforsu hetan rezultadu di’ak, ami ekipa nia mehi kontinua la’o ba oin ho edukasaun pozitivu ba joven sira,” dehan Reprezentante Jogador ekipa FC Kota Laran iha kampu Caisido tersa (19/05/2025).
Xefe suku Tirilolo, Elvino Freitas Belo apresia jogador sira kada klube tamba, manten unidade no hatudu talentu durante jogu semana tolu hahú loron 27 to’o 19 maiu (2026), alende ne’e agradese ba membru estrutura konsellu suku hamutuk veteranus no komunidade, tamba apoia másimu ba jogu komunitariu referida ho susesu.
“Ohin jogu finál hau agradese ba joven sira durante ne’e hau nia komunidade no joven sira hatudu talent, ne’ebé mak di’ak laiha problema ka dezentedementu ba malu tamba ne’e ami apresia,” dehan Xefe Suku Tirilolo.
Prezidente Autoridade Munisipiu Baucau, veneranda Eurico Lemos Martins louva maturidade joven Tirilolo ne’ebé partisipa jogu komunitariu iha Caisido, hatudu maturidade liuhosi unidade, nune’e mós prepara fini jogador futuru nian.
“Ha’u hare agen ida ne’e (Caisido suku Tirilolo) pontensial tebe-tebes bele hare hetan potensiál ba desportu feto no mane, tamba hatudu atitude ne’ebé di’ak kontribui ba paz no dezenvolvimentu nu’udar Prezidente Autoridade Munisipiu Baucau ohin lokraik mai halo enseramentu ba jogu komunitaria ne’ebé Tirilolo oan sira hatudu ho paz no estabilidade,” dehan Veneranda.
Jogu komunitariu ne’e ho intensaun anima komunidade hodi selebra loron Restaurasaun Independénsia ba dala-24 tinan 2026, nune’e kria lasu amizade entre komunidade suku Tirilolo, alende ne’e prepara jogador foinsa’e hodi partisipa kompetisaun nivel Suku, Postu, Munisipiu no Nasionál.
Enkuantu, jogu komunitariu suku Tirilolo ne’ebé realiza iha Casido modalidade futeboll 11 mane ekipa 11 mak partisipa, voli ekipa 11 kompostu mane ekipa 4 no feto ekipa 7. Orsamentu apoiu ba jogu ne’e mai husi emprezáriu suku Tirilolo ho montante dolár amerikanu rihun rua, atus rua($ 2,200).
Ekipa Kobertura : RCLM
