RCLM Baucau (15/05/2026)—Komemorasaun loron 20 de Maio Restaurasaun Independensia ba dala-24 tinan ne’e (2026), Postu Administrativu Baguia sei realiza Içar Bandeira Nasionál Republika Demokrátika Timor-Leste (RDTL), iha suku Samalari.
Administrador Postu Administrativu Baguia Mario Xavier da Silva hateten, loron Nasionál Restaurasaun Indepedénsia ba dala-24 tinan ne’e, realiza iha suku Samalari bazeia ba desizaun enkontu kolletiva husi Autoridade suku 10 iha Postu Administrativu Baguia.
“Normalmente ne’e desizaun ne’ebé mak iha liu hosi enkontru sira, ami halo iha Postu depois ita deside kada suku tuir área Geografia ka zona tolu,” informa Administrador Baguia ba RCLM liu husi via telefone.
Autoridade Baguia afirma, komemorasaun Restaurasaun Independensia hala’o Içar Bandeira Nasionál iha kuarta semana oin (20/05/2026) iha suku Samalari, maibe atividade komisaun hahu realiza hodi priense ba loron Nasionál ne’e mak hanesan desportu komunitariu futebol-11 no voliboll feto.
Alende ne’e ekipa korpu Içar Bandeira Nasionál kompostu husi eskola ensinu baziku Samalari, ensinu baziku Boa-ua Lavateri, hamutuk Polisia Eskuadra Postu Bagui halo ona prepasaun maske sei iha kondisaun udan.
Autoridade Baguia apela, komunidade hotu nia partisipasaun iha loron Nasionál Restaurasaun Indepedensia ba dala-24 tinan ne’e no nafatin kria unidade, hodi kontribui ba prosesu dezenvolvimentu.
“Husu komunidade Baguia komemora restaurasaun indepedénsia ba dala-24 ne’ebé sei hala’o iha suku Samalari, husu komunidade nia kontribuisaun ba eventu ne’e no husu kria páz ka unidade entre ita iha Postu Administrativu Baguia,” Autoridade Baguia apela.
Enkuantu Postu Administrativu hetan alokasaun orsamentu ba Restaurasaun Independensia tinan ne’e ho montante atus hitu lima nolu ($ 750) husi Autoridade Munisipal.
Postu Baguia iha suku 10 hanesan suku Afaloicai, Alaua-kraik, Alaua-leten, Defa-Uasi, Hae-coni, Larisula, Lavateri, Osso-huna, Samalari no Uacala. Bazeia dadus husi Sistema Integradu Informasaun Gestaun Daus Suku no Aldeia (SIIGSA) tinan 2025, rejista populasaun hamutuk 16.324 no uma-kain 3.564.
Ekipa Kobertura : RCLM
