RCLM Baucau (11/05/2026)—Suspeitu ho inisial NL oho nia alin Domingos Batista idade 63, iha aldeia Bubuloma Suku Saelari Postu Administrativo Laga Munisipiu Baucau sabadu (09/05/2026), mais ou menus tuku ida meudia oras Timor Leste.
Xefe suku Saelari Mateus Cardoso hateten, tuir informasaun kronologia akontesentu ne’e, bainhira Vitima Domingus Batista lori ho dima atu ba oho nia maun maibe lakonsege, bainhira nain rua dudu mak maun halo auto defeza foti aidona baku ba matebian nia ulun to’o mate fatin.
Xefe suku afirma depois akontesementu, parte PNTL Munisipiu liu husi seksaun Investigasaun kriminal no hamutuk ho Policia eskuadra Laga to’o kedas iha lokal do krime, hodi halo identifikasaun ba mate isin no lori suspeitu ba komando PNTL hodi halo investigasaun.
“Motivo akontesementu ne’e seidauk hatene, tamba sira nain rua mesak mesak ne’eba maun oho tiha alin mak komunidade sira informa mak ami foin hatene, maibe evidensia sira hanesan aidona no dima inklui suspeitu, parte policia lori ona ba Baucau hodi halo investigasaun”. Dehan Xefe Suku Saelari ba Jornalista RCLM Baucau Liu husi Via telefone domingu ne’e.
Xefe suku husu ba komunidade sira bainhira problema ruma ho ulun malirin hodi rezolve ho diak.
“Nu’udar autoridade, husu ba komunidade sira se karik buat ruma naksal ruma rezolve ho ulun malirin, maibe nain rua hanesan ne’e ona ba futuru labele hanesan ne’e nafatin”. Haktuir Mateus
Entertantu Parte familia matebian halo ona deklarasaun ho policia, hodi lalori ba autopsia hodi prosesu ba serimonia funebre.
Relasiona ho Kazu ne’e parte Jornalista tenta atu konfirma ba komando PNTL Munisipiu Baucau, maibe Xefe Gabinete Komandu nian hateten katak, Parte seksaun Investigasaun Krimanal no Policia eskuadra Laga seidauk enterega relatoiu kona ba kazu ne’e.
Ekipa Kobertura : RCLM
