RCLM Baucau (08/05/2026)—Postu Administrativu Baucau vila Munisípiu Baucau realiza abertura jogu komunitáriu iha kampu futsál kompaña Bravo, Batallao Ordem Públiku (BOP) vila Nova ho tema “hamutuk ita kontribui hametin páz iha ita nia Postu Administrativu” atu komemora loron restaurasaun Independensia Timor-Leste ba dala-24 tinan ne’e, (20-05-2002/20-05-2026).
Prezidente Komisaun Organizadór Loron Nasionál Postu Administrativu Baucau vila, Incensinio António da Silva hateten, jogu komunitáriu ne’e involve suku 13 iha Postu Baucau vila ho objetivu anima komunidade hodi komemora loron restaurasaun tinan ne’e.
Incensinio afirma, jogu komunitáriu ne’e kompostu modalidade haat maibé hafoin abertura hahú ho modalidade futsál mane, volyball feto, enkuantu maratona inklui jogu tradisionál hana kalik sei iha faze preparasaun.
“Jogu komunitáriu ne’e amizade ha’u sente anima komunidade, tamba antes ne’e jogu kada bairu, maibé agora kompetisaun kada suku no jogo hahú ohin to’o loron 19 fulan ida ne’e,” hateten Prezidente Komisaun Organizadór ba Jornalista sira iha kampu futsál kompaña Bravo Batallão Ordem Públiku vila Nova sesta ne’e.
Pontu Fokál Ministériu Desportu Arte no Kultura (MJDAK) iha Munisípiu Baucau Elisio Placido Ramos dehan, parte MJDAK apoia jogu komunitáriu Postu Baucau vila ho montante orsamentu dolár Amerikanu rihun tolu, atus lima ($ 3.500).
“Jogu komunitáriu ne’e apoia diretamente husi MJDAK atu fó espasu ka oportunidade ba jogadór sira futsál, voliból feto, maratona inklui modalidade tradisionál hanakali,” informa Elisio.
Jogadór modalidade futsál ekipa Suku Bucoli Ruben da Silva sente orgullu partisipa jogu komunitáriu postu administrativu Baucau vila, iha ámbitu komemorsaun loron restaurasaun Independensia Timor-Leste tamba, aplika talentu ho adversariu suku seluk.
“Ami sente kontente tamba jogu ida ne’e fanu juvetude Postu Administrativu Baucau vila hodi komemora loron 20 Maio Restaurasaun Independensia maske derota suku Buruma,” dehan Ruben.
Komisaun organizadora rejista ekipa jogadór modalidade futsál mane hamutuk 13, kompostu husi suku Bahú, Buibau, Builai, Buruma, Bucoli, Gariuai, Caibada, Caibada Makasa’e, Tirilolo, Triloca, Samalari, Seisal no Uailili, enkuantu modalidade voli ból feto ekipa hamutuk 9 nune’e totál ekipa hamutuk 22.
Enkuantu abertura jogu komunitáriu Postu Baucau vila partisipa husi reprezenta Autoridade Munisipál, segundu komandante PNTL Munisípiu, Reprezentante F-FDTL Komponente Terrestre iha Lanu, Reprezentante Konsellu Munisípál Kombatente Libertasaun Nasionál, Administrador, Xefe Suku Bahú, Buruma, Tirilolo, Builai, Caibada Makasa’e inklui komunidade sira.
Ekipa Kobertura : RCLM
