RCLM Baucau (07/05/2026)—Governo liu hosi Linas Ministeriál hala’o konsultasaun sidadania, kona bá preparasaun jornada orsamentu estadu tinan 2027 iha Munisipiu Baucau.
Xefe Departamentu Diresaun Jerál planeamentu orsamentu Ministériu Finansas José Fátima hateten, konsultasaun sidadania ne’e atu rona opiniaun entidades oi-oin iha báze, liu-liu prioriedade hanesan Bee-moos, Edukasaun, Saúde no infraestrutura báziku seluk, ne’ebé reflete bá komunidade sira nia moris hodi elabora ba orsamentu jerál estadu tinan 2027.
“Nesesidade báziku prioridade ne’e iha báze tamba ne’e mak antes elaborasaun planu orsamentu 2027, tuir lei enkuadramentu legál fó biban Governu liu hosi Ministériu Finansas ho Ministériu Agrikultura, Ministériu Turizmu no Ambiente no Ministériu relevante sira seluk, hakbesik mai hodi rona saida mak komunidade sira nia presiza,” dehan José iha CCB vila Antiga Baucau kinta ne’e.
Fatin hanesan Prezidente Autoridade Munisipiu Baucau Veneranda Eurico Lemos Martins konsidera, konsulta sidadania importante tamba, atu kria ponte komunikasaun no kordenasaun maka sai pontus importante ba makina sira no servisu iha báze.
“Konsultasaun ida ne’e atu kria ponte de komunikasaun, hanesan ha’u dehan bei-beik, komunikasaun no kordenasaun maka sai pontu importante ba makina sira, ita no servisu sira iha kraik, tanba objetivu prinsipál ba konsulta públika ne’e maka ita iha jestaun tolu maka ejize transparensia, inkluzaun no akuntabilide” dehan PAM.
Reprezentante partidu polítika FRETILIN Munisípiu BauCau Gabriel da Piedade dehan, konsultasaun Sidadania ne’e persiza tebes atu rona ema hotu-hotu ninia hanoin, no oinsá planu orsamentu ba tinan 2027 nian.
“Importante liu ita hare setor produtivu sira, liu-liu Agrikultura, Edukasaun no Saúde ne’ebé maka ita hotu hatene, maibé liu-liu maka setor Agrikultura tamba baze ba ekonomia maka Agrikultura” hateten Gabriel.
Hola parte iha konsulta Sidadania ne’e, kompostu husi konselho konsultivu Munisipal, konsellu kordenasaun Munisipal, CMCLN Baucau, reprezentante Sucos, konfisoens relizióju, Asosiasaun Ema ho Defisiénsia, reprezentante Sosiedade Sívil, reprezentante juventude, Grupu feto, inklui Diretores servisu Munisipal no delegasaun territorial.
Ekipa Kobertura :RCLM
