RCLM Baucau (05/05/2026)—Sidadaun sira kontinua preokupa no ejije atu hadia sistema atendimentu iha Balkaun Uniku Munisipiu Baucau, tamba kada loron segunda no tersa atende Bilete identidade ba ema nain lima nolu, iha nebe ema barak hadau malu fatin hodi trata bilite identidade no balun obrigadu fila, tamba la hetan fatin hodi trata dokumentus Bileti identidade.
Abitante Orlando Amaral Gomes hateten, mai iha madruga maibe la hetan atendimentu tamba sistema atendimentu ba komunidade la diak .
“Oinsa sira bele hadia sistema atu uza, oinsa ferik katuas sira mai husi Quelicai, Baguia no husi ne’ebe deit mai atu simu mai atu halo bileti identidade balun fila deit la konsege tama liu to’o iha portaun, ne’e duni sira tenke hadia sistema uituan hodi atende ferik katuas sira ne’ebe lao dok ne’e, tamba sira fila ba fila mai la haten tenke hadia sistema”. Dehan Abitante Orlando ba jornista sira iha Balkaun Uniku Segunda, 04/05/2026
Entertantu Abitante Emilia Ximenes hateten, sente triste tebes tamba forsa la iha hodi dudu malu ho mane sira hodi trata BI, tamba ne’e husu ba Governu atu muda sistema halo atendimentu iha Postu Administrativo Sira.
“Mai ne’e atu halo BI ami mai husi dook ho transporte, to’o mai iha ne’e atendimentu kuaze ema simu 40 deit, entaun ami mai terlambat entaun lakonsege atendimentu, ami sente triste tebes bainhira ami la’o dook lakon transporte to’o iha ne’e lakonsege atendimentu, husu ba kompetente bele karik loke iha postu postu sira ne’ebe hodi bele halo atendimentu ba ami”. Hatete Emilia
Hatan ba preokupasaun ne’e Kordenador Balkaum Uniku Munisipiu Baucau Euclides Ornai hateten, balkaun uniku tenke tuir regras ne’ebe estabelese ona hodi imprime bileti Identidade ba ema nain lima nolu, tamba atu halo jestaun ba makina Fargo hodi bele utuliza ba iha tempu naruk.
“Nunee husu ba ita nia sidadaun sira hotu ida ne’e mak regra depois ita hotu hotu bele kompri ita kopera i hau hanoin mezmu ke numeru 50, maibe atendimetu la hotu atendimentu ne’e sempre iha hela deit semana semana ita sempre halo atendimentu ida ne’e sei la hotu no rajaun sira seluk, ne’ebe mak ita halo simu sidadaun lima nolu tamba ita hakarak halo jestaun mos ba ita nia makina fargo ne’ebe mak produs bileti identidade, se makina ida ne’e mak obriga demais nia bele avaria, se kuandu avaria ita tenke gastu fila fali povo nia osan hodi halo manutensaun ida ne’e sasan povo ninian ita presija kuidadu sasan ida ne’e povo Baucau ninian entaun ita presija kuidadu didiak para nia bele util, dura uza ba tempu naruk nian”. Haktuir Euclides
Euclides hatutan Balkaun Uniku Munisipiu Baucau iha ona planu atu halo atendimentu iha Postu Administrativo no suku sira iha futuru oin mai, enkuantu dadaun ne’e Bileti Identidade orijinal kuaze rihun ida resin mak iha Balkaun Uniku Munisipiu Baucau hodi halo atendimentu ba sidadaun sira.
Ekipa kobertura : RCLM
