RCLM Baucau (30/04/2026)—Asistensia Legal ba Feto no Labarik realiza Dialogu Munisipál ho Tema “Haforsa Komunidade, LGBTIQ, Ema ho Difisiensia nia koñesementu hodi asesu sistema formal ba iha Justiça.
Koordenador Prevensaun no Advokasia iha ALFELA António Marques hateten, difikuldades ne’ebe mak LGBTIQ no EhD hasoru mak, iha bareira balun ne’ebe mak sira labele asesu ba sistema formal no sira hetan estigmasaun no diskrimasaun, tamba la iha ema ida atu suporta sira ba prosesu sistema justiça formal ba sira.
“Ida ne’e mak halo sira sente dilematiku, dala ruma sira ba ema hare liu ba sira nia seksu, dala ruma sira sente katak ladun diak ba sira nia an, entaun sira retira fila fali atu lori prosesu kazu ne’e ba dalan justiça formal hanesan mos ho ita nia maluk ema ho difisiensia sira, atu asesu ba justiça formal buat balun limita sira tamba la iha rampa inklui lia jestual”. Dehan Antonio Marques ba jornalista sira iha uma Dame Watulete Baucau, Quarta 29/04/2026
ALFELA nia papel mak kontinua atu halo asistensia legal ba feto no labarik, liu liu hare krime violensia bazeia ba jeneru, inklui ema ho difisiensia, LGBTIQ.
“ALFELA nia papel ida kona ba prenvensaun entaun ita kontinua sensibilizasaun fahe informasaun liu husi Workshop, treinamentu atu eleva diak koñesementu komunidade nian, ita nia parseiru sira, no mos ita nia familia sira bele hatene hodi mos bele kontribui hodi labele halo diskriminasaun hasoru ema ho difisiensia no LGBTIQ sira”. Haktuir Antonio
Durante ne’e ALFELA halo ona asistensia legal ba feto no labarik inklui ema ho difisiensia, LGBTIQ husi teritoriu hamutuk besik rihun ualu no husi kazu rihun hitu resin ne’e ALFELA konsege finaliza ona, enkuantu prosesu ne’ebe mak ativo kuaze atur rua resin.
Ekipa Kobertura :RCLM Baucau
